9مئی نوں پاکستان اُتے حملہ ہویا،محسن نقوی

لہو ر(پنجابی میڈیاگروپ)نگران وزیراعلیٰ پنجاب محسن نقوی نے آکھیا اے کہ 9مئی نوں لہور سنے ہور شہراں وچ اَت گردی دے ہولناک واقعات ہوئے تے پاکستان اُتے حملہ کیتاگیا،ات گردی دے اینہاں واقعات وچ ہُن تک دے تخمینے مطابق 600کروڑ روپے دا نقصان ہویا، نقصان 600کروڑ روپے توں کِدھرے وَدھ اے ،اجے ہور تخمینے دا تعین کیتا جارہیا اے ۔وزیراعلیٰ آفس وچ سینئر صحافیاں نال گل بات کردیاں ہویاں نگران وزیراعلیٰ محسن نقوی نے دسیا کہ سارے حملے، جلاؤو گھیراؤ،لٹ مار تے توڑ پھوڑ باقاعدہ منصوبہ بندی تحت کیتی گئی۔پنجاب وچ 23عمارتاں نوں ساڑیاگیا۔ سرکاری و نجی املاک تے پلس دیاں گڈیاں نوں تباہ کیتا گیا۔پلس تے ہور اداریاں دی108گڈیاں ساڑیاں گئیاں،جناح ہاؤس(کورکمانڈر ہاؤس)،بینک،ایمبولینساں نوں وی ساڑیاںگیا۔ میانوالی وچ اسلحہ برداراںنوں جمع کیتا گیا۔نگران وزیراعلیٰ محسن نقوی نے آکھیا کہ ٹھوس شواہد نیں کہ پی اے ایف بیس میانوالی اُتے جہازاں نوں ساڑن دی مذموم پلاننگ کیتی گئی،جس وچ اوہ نکام رہے۔ سیاست دی آڑوچ ات گردی کیتی گئی۔