عمران خان نے ایس لئی سب کجھ ساڑدتا کہ رسیداں نہیں ہیں،احسن اقبال

نارووال(پنجابی میڈیاگروپ)وفاقی وزیر منصوبہ بندی تے پاکستان مسلم لیگ (ن) دے سینئر رہنما احسن اقبال نے القادر ٹرسٹ کیس دا حوالہ دیندیاں ہویاں آکھیا اے کہ عمران خان نے ملک دی نجی و سرکاری تنصیبات تے املاک نوں ایس لئی ساڑکے راکھ کردتا کہ اوہناں دے کول رسیداں نہیں نیں۔میڈیا نال گل کردیاں ہویاں احسن اقبال نے آکھیا کہ عمران خان دا دامن اگر اینہاں ہی صاف سی تے اوہ جواب دیوں کہ 2 اگست 2022 توں لے کے اج تک تُسی فنانشل ٹائمزدے خلاف برطانیہ وچ مقدمہ کیوں نہیں کیتا، ایس لئی کہ تہانوں معلوم اے کہ برطانوی عدالت توں تہاڈے اُتے بدعنوانی دی مہر تصدیق ہو گئی۔اوہناں نے آکھیا اے کہ پراپرٹی ٹائیکون ملک ریاض اُتے عائد جرمان لئی معاملات طے کر کے پی ٹی آئی چیئرمین عمران خان نے القادر یونیورسٹی لئی650 کنال اراضی حاصل کیتی ۔وفاقی وزیر نے آکھیا کہ عمران خان ہمیشہ دُوجیاں توں رسیداں فراہم کرن دا کہندے رہندے نیں لیکن جد اپنی واری آئی تے اوہ اینج کرن وچ نکام رہے۔