جنگاں دے انسانیت اتے تباہ کن اثرات ہندے نیں ،بلیغ الرحمن

مقبوضہ جموں کشمیر وچ کشمیری اج وی اپنے جائز حق خودارادیت توں محروم نیں
لہور (پنجابی میڈیا گروپ)گورنر پنجاب محمد بلیغ الرحمن نال گورنر ہائوس لہور وچ کورین تنظیم ہیون لی کلچر ورلڈ پیس ریسٹوریشن آف لائٹ دے وفد نے سینیٹر کامران مائیکل دی قیادت وچ ملاقات کیتی۔ ایس موقع اتے گل بات کردیاں ہویاں گورنر پنجاب محمد بلیغ الرحمن نے آکھیا کہ پاکستان نے ات گردی خلاف جنگ تے قیام امن لئی گراں قدر قربانیاں دتیاں نیں جنہاں نوں اقوام عالم نے ہر سطح اتے سراہیا اے۔ اونہاں نے آکھیا کہ تہاڈی تنظیم 2014 توں دنیا وچ امن لئی جیہڑیاں کوششاں کررہی اے قابل تعریف نیں تے ایس مقصد لئی دنیا بھر توں لوکاں نوں اکٹھا کرنا اک قابل تحسین کم اے۔اونہاں نے آکھیا کہ جنگاں دے انسانیت اتے تباہ کن اثرات ہندے نیں تے مقبوضہ جموں کشمیر وچ کشمیری اج وی اپنے جائز حق خودارادیت توں محروم نیں۔گورنر پنجاب نے آکھیا کہ ہندوستان کشمیریاں دے جائز حق خودارادیت نوں اونہاں دے بنیادی حقوق سلب کرکے جبر نال دبان دی کوشش کر رہیا اے۔