پاکستان افغانی مہاجراں دی میزبانی جاری رکھے گا، دفتر خارجہ

اسلام آباد( پنجابی میڈیا گروپ)ترجمان دفتر خارجہ ممتاز زہرا بلوچ نے آکھیا اے کہ افغانی مہاجراں بارے پالیسی وچ کوئی تبدیلی نہیں آئی، پاکستان افغانی مہاجراں دی میزبانی جاری رکھے گا۔ہفتہ وار نیوز بریفنگ وچ ترجمان دفتر خارجہ ممتاز زہرا بلوچ نے آکھیا کہ حالیہ فیصلے نال قنونی طور اُتے وَسن والے افغانی مہاجر متاثر نہیں ہون گے، فیصلہ غیر قنونی افغانی باشندیاں بارے اے، جنہاں دے کول ویزا یا دستاویزاں نہیں ہون گیاں اونہاں دے خلاف کارروائی ہوئے گی ایس پالیسی دا تعلق کسی خاص ملک نہیں بلکہ سب نال اے ۔اونہاں نے آکھیا کہ عالمی کپ وچ پاکستانیاں نوں ویزیاں دے اجرا لئیبھارت نال رابطے وچ ہاں، بھارت کھیڈاں نوں سیاست دے نال نہ جوڑے، بطور میزبان ملک بھارت پاکستانی شائقیناں دے رَستے وچ عالمی کپ دے میچ ویکھن وچ رکاوٹ نہ پائے۔ترجمان دفتر خارجہ نے دسیا کہ نگران وزیر خارجہ تبت وچ ٹرانس ہمالیہ فورم وچ پاکستان دی نمائندگی کر رہے ہاں، نگران وزیرخارجہ نے منگولیا دے نائب وزیراعظم نال ملاقات کیتی، نگران وزیر خارجہ چینی وزیر خارجہ دی دعوت اُتے چین دے دورے اُتے نیں۔اونہاں داکہنا سی کہ ٹرانس ہمالیہ فورم دا آغاز جغرافیائی رابطے، محولیاتی تحفظ تے ثقافتی رابطے نوں ودھان لئی کیتا گیا، نگران وزیر خارجہ نے ٹرانس ہمالیہ فورم دے اجلاس نال خطاب کیتا تے فورم دی سائیڈ لائن اُتے چین دے وزیر خارجہ نال ملاقات وی کیتی، پاک، چین وزرائے خارجہ دے وچکار ملاقات اندر خطے سنے علاقائی معاملیاں اُتے تبادلہ خیال کیتا گیا۔ترجمان دفتر خارجہ نے ہور آکھیا کہ مسئلہ فلسطین اُتے پاکستان دی پالیسی بڑی واضح اے، پاکستان فیصلے اپنے قومی مفاد وچ لئیگا۔