نوازشریف دی واپسی دے پروگرام وچ کوئی تبدیلی نہیں ہوئی، ن لیگ

اسلام آباد( پنجابی میڈیا گروپ) مسلم لیگ ن دے سینیٹر عرفان صدیقی نے آکھیا اے کہ نواز شریف دی واپسی دا پروگرام فائنل اے، پروگرام وچ کوئی تبدیلی نہیں ہوئی۔ سینیٹر عرفان صدیقی نے اپنے ویڈیو پیغام وچ آکھیا اے کہ نواز شریف پہلاں سعودی عرب عمرہ ادا کرن لئی جان گے، اوہ متحدہ امارات وی قیام کرن گے جس دے بعد 21 اکتوبر نوں پاکستان آن گے۔عرفان صدیقی نے آکھیا کہ نوازشریف دی واپسی دے پروگرام نوں حتمی شکل دے دتی گئی اے، کسی مفاہمتی گروپ ولوں اونہاں دے واپس نہ آن دیاں خبراں چلائیاں جا رہیاں نیں جیہڑیاں کہ سچیاں نہیں۔اونہاں نے آکھیا کہ مسلم لیگ ن وچ نہ تے کوئی مفاہمتی گروپ اے نہ مزاحمتی، نواز شریف دی واپسی بارے سب افواہواں دی تردید کردا ہاں ۔