سائفر کیس: عدالت داچیئرمین پی ٹی آئی دی درخواست اُتے چھیتی فیصلہ دین دا عندیہ

اسلام آباد( پنجابی میڈیا گروپ)اسلام آباد ہائی کورٹ نے سائفر کیس دے جیل ٹرائل تے جج تعیناتی دے خلاف چیئرمین پی ٹی آئی دی درخواست اُتے 2توں3دناں وچ کیس دا فیصلہ دین دا عندیہ دے دتا۔اسلام آباد ہائی کورٹ دے چیف جسٹس عامر فاروق نے چیئرمین پی ٹی آئی دی چھیتی فیصلہ سنان دی متفرق درخواست اُتے سماعت کیتی، چیئرمین پی ٹی آئی ولوں وکیل شیر افضل مروت عدالت وچ پیش ہوئے۔شیر افضل مروت نے آکھیا کہ سائفر کیس دا جیل ٹرائل شروع ہوگیا اے لیکن ساڈھی درخواست اُتے اجے فیصلہ نہیں آیا، پیر نوں فیر جیل سماعت لئی سائفر کیس مقرر اے۔چیف جسٹس عامر فاروق نے ریمارکس د تے کہ میں چھیتی کر دیندا ہاں پیر نوں تے نہیں لیکن2یا3 دناں وچ فیصلہ کر دیاں گا، اک گل ہور دسنا کہ پریس وچ آیا اے کہ اڈیالہ جیل منتقلی اُتے تہانوں اعتراض اے؟ حالانکہ تہاڈی اپنی پٹیشن اٹک توں اڈیالہ منتقلی سی اوہ منظور ہوئی اے ۔چیف جسٹس نے وکیل شیر افضل مروت نال مکالمہ کر دیاںہویاں آکھیا کہ فیرایہ پریس وچ تہاڈے ولوں اینہی بحث کیوں چل رہی اے ؟ وکیل نے دسیا کہ ساڈھے ولوں آفیشلی تے ایسا کوئی بیان نہیں دتا گیا۔چیف جسٹس عامر فاروق نے آکھیا کہ میں حیران ساں کہ تہاڈی اپنی پٹیشن منظور ہوئی فیر ایہ کیوں کہہ رہے نیں ۔شیر افضل مروت نے آکھیا کہ ساہنوں ایہ سی کہ اڈیالہ جیل وچ Bکلاس دین گے لیکن نہیں دتی گئی، جس اُتے چیف جسٹس نے ریمارکس دتے کہ بیٹر کلاس ہوئے گی کھوسہ صاحب دی کل پٹیشن سی ایس اُتے نوٹس کر دتے نیں۔واضح رہے کہ جیل ٹرائل تے جج تعیناتی خلاف درخواست اُتے فیصلہ پہلاں توں محفوظ اے۔