نوازشریف دی واپسی کسی گارنٹی دا نتیجہ نہیں، اسحاق ڈار

اسلام آباد(پنجابی میڈیا گروپ)مسلم لیگ ن دے سینئر رہنما تے سابق وفاقی وزیر خزانہ اسحاق ڈار نے آکھیا اے کہ نواز شریف 21 اکتوبر نوں وطن واپس آرہے نیں، اونہاں دی واپسی کسی گارنٹی دا نتیجہ نہیں۔میڈیا نال گل بات کردیاں ہویاں اسحاق ڈار دا کہنا سی کہ قائد مسلم لیگ نوں واپسی دے سفرلئی کسی گارنٹی یا یقین دہانی دی لوڑ نہیں، نواز شریف دی واپسی اُتے ضمانت داعمل وی ہو جائے گا، اج تک ایس ملک وچ کس نوں حفاظتی ضمانت نہیں ملی، میں حفاظتی ضمانت لین توںانکار کیتا سی۔اونہاں نے آکھیا کہ ڈالر دی حقیقی ویلیو 250 روپے اے، ستمبر 2022 وچ آکھیا سی کہ ڈالر ریٹ 200 توں گھٹ ہونا چاہیدا، ڈالر نوں 250 روپے دے نیڑے آنا چاہیدا اے، کوئی وجہ نہیں کہ ڈالر دی قیمت واپس اُتے جائے، انٹر بینک سسٹم تے ایکسچینج کمپنیاں ذمہ داری دا مظاہرہ کر رہیاں نیں، ساڈھے دور وچ وی ڈالر دی سمگلنگ تے ذخیرہ اندوزی خلاف ایکشن لیا گیا سی۔اسحاق ڈار دا کہنا سی کہ امید اے آئی ایم ایف دا اگلا اقتصادی جائزہ کامیاب ہوئے گا، جس دے نتیجے وچ پاکستان نوں 70 کروڑ ڈالر دی قسط ملے گی، ساریاں قوتاں مل کے کم کر رہیاں نیں، کوئی قوت مینوں نکام نہیں کرنا چاہندی سی، سب قوتاں مل کے کم کرن گیاں تے ملک اگے ودھے گا۔سابق وفاقی وزیر خزانہ نے ہور آکھیا کہ پاکستان نوں دوبارہ معاشی قوت بنا کے جی ٹونٹی وچ شامل کرنا اے، مہنگائی ختم تے عوامی مسائل حل کرن لئی ہمت دی لوڑ اے۔