سابق وزیراعظم نواز شریف دی میڈیکل رپورٹ لہور ہائیکورٹ وچ جمع

لہور( پنجابی میڈیا گروپ)پاکستان مسلم لیگ ن دے قائد و سابق وزیراعظم نواز شریف دی میڈیکل رپورٹ لہور ہائیکورٹ وچ جمع کروا دتی گئی۔وکیل امجد پرویز نے رجسٹرار آفس وچ نواز شریف دی میڈیکل رپورٹ جمع کرائی۔برطانوی معالج دی رپورٹ دے مطابق نواز شریف نوں اجے وی دل دی بیماری دی شکایت اے، اونہاںنوں شوگر تے ہور مرضاںپاروں پاکستان تے لندن وچ مسلسل فالو اپ دی لوڑ اے، نواز شریف دی ماضی وچ ہونے والی بائی پاس سرجری تے انجیو پلاسٹی پاروں مسلسل چیک اپ ہُندا رہیا۔سابق وزیراعظم دے معالج نے رپورٹ وچ لکھیا کہ اسیں نواز شریف دی پہلاں اینٹی اینجنل تھراپی دی بہتری لئی علاج کیتا، قائد مسلم لیگ ن نوں انجائنا دی علامت تے کورونا پاروں پاکستان جان توں روک دتا سی، جَد نواز شریف وچ مرض دیاں علامتاں وَدھ گئیاں تے اسیں اونہاں دی انجیو پلاسٹی دوبارہ کرن دا فیصلہ کیتا۔رپورٹ وچ ہور آکھیاگیا اے کہ نواز شریف دی انجیو پلاسٹی نومبر 2022 وچ کیتی گئی، ایس دوران نواز شریف نوں سٹنٹ وی پائے گئے۔واضح رہے کہ سابق وزیراعظم دی میڈیکل رپورٹ برطانیہ دے رائل برومپٹن ہسپتال نے جاری کیتی ، رپورٹ کنسلٹنٹ کارڈیالوجسٹ پروفیسر کارلو ڈی ماریوولوں جاری کیتی گئی اے۔