سائفر کیس: چیئرمین پی ٹی آئی خلاف ٹرائل روکن تے مقدمہ خارج کرن دیاں درخواستاں یکجا

اسلام آباد(پنجابی میڈیا گروپ)اسلام آباد ہائیکورٹ نے چیئرمین پاکستان تحریک انصاف(پی ٹی آئی)دی سائفر کیس دا ٹرائل روکن تے مقدمہ خارج کرن دیاں درخواستاں اکٹھیاں کر دتیاں۔چیف جسٹس اسلام آباد ہائی کورٹ جسٹس عامر فاروق نے چیئرمین پی ٹی آئی ولوں سائفر کیس ختم کرن تے ٹرائل روکن بارے درخواستاں اُتے سماعت کیتی۔کیس دی سماعت شروع ہوئی تے چیئرمین پی ٹی آئی دے وکیل لطیف کھوسہ روسٹرم اُتے آ گئے۔وکیل لطیف کھوسہ نے دلائل دیندیاں ہویاں موقف اپنایا کہ سائفر کیس ٹرائل کورٹ وچ کارروائی روکن تے فرد جرم عائد کرن دے فیصلے خلاف درخواست اے، معاملہ ہائیکورٹ وچ چل رہیا اے تے فیصلہ محفوظ اے، لہور ہائیکورٹ نے وی ایف آئی اے دے اک کیس وچ حکم امتناعی جاری کیتا ہویا اے۔لطیف کھوسہ نے آکھیا کہ اسیں بار بارآکھیا کہ چھیتی نہ کیتی جائے، معاملہ ہائیکورٹ وچ چل رہیا اے، ساہنوں آفیشل سیکرٹ ایکٹ بارے کافی کنسرن نیں، کیہڑی سکیورٹی نوں خطرہ ہویا یا سیکریسی لیک ہوئی؟ بھٹو صاحب نے وی راجہ بازار وچ تقریر اندر ایسطرح ہی دسیا سی تے کیہ ہویا؟میرے موکل قومی ہیرو نیں تے دُنیا جاندی مَن دی اے ہُن اوہ بے گناہ جیل وچ نیں۔