پاکستان اسٹاک ایکسچینج؛ 50ہزار پوائنٹ دی نفسیاتی حد کراس کر گئی

لہور(پنجابی میڈیا گروپ)پاکستان اسٹاک ایکسچینج وچ اج غیر معمولی تیزی دا رجحان اے، جس دے نتیجے وچ50 ہزار پوائنٹ دی نفسیاتی حد اک وارفیر کراس ہو گئی۔ملک وچ شرح سود وچ متوقع کمی تے ڈالر دی قدر گھٹن نال سرمایہ کاراں دا اعتماد بحال ہون دے نتائج سامنے آ رہے نیں۔ پاکستان اسٹاک ایکسچینج وچ صرف 2دن دے وقفے بعد جمعرات والے دن وی 50 ہزار پوائنٹ دی نفسیاتی سطح کراس ہو گئی۔واضح رہے کہ 2دن پہلاں ہی پی ایس ایکس وچ 50 ہزار پوائنٹ دی حد کراس ہوئی سی تے ایسا6 ورھے 4 مہینیاں بعد ہویا سی۔کاروباری ہفتے دے چوتھے دن صبح ہی توں حصص بازار وچ تیزی دا رجحان جاری اے تے پی ایس ایکس وچ مجموعی طور اُتے 942پوائنٹ دے وڈھے اضافے نال کے ایس ای 100 انڈیکس وَدھ کے 50374 پوائنٹ دی سطح اُتے آ گیا۔مارکیٹ ذرائع مطابق آئل اینڈ گیس، اسٹیل، انرجی تے سیمنٹ سیکٹر دے شیئرز وچ زیادہ سرمایہ کاری ویکھن وچ آ رہی اے۔ کاروباری تے سرمایہ کار ذرائع حکومتی اقداماں دے نتیجے وچ پاکستان اسٹاک ایکسچینج وچ ہون والی پیش رفت نوں اہم سنگ میل قرار دے رہے نیں۔