اسرائیلی فوج دی غزہ وچ اک ہور ہسپتال اُتے بمباری، ہور433فلسطینی شہید

غزہ (پنجابی میڈیا گروپ)اسرائیل ولوں فلسطینیاں اُتے مظالم رُک نہ سکے ، غزہ وچ اسرائیلی فوج نے ہسپتالاں نوں وی نشانے اُتے رکھ لئیا ، اک ہی دن وچ ہور433فلسطینیاں نوں شہید کردتا جنہاں وچ عورتاں تے بال وی شامل نیں ۔عالمی سفارتی کوششاں وی اسرائیلی بربریت نوں گھٹ نہ کر سکیاں ، غزہ وچ اسرائیلی فضائیہ نے 24 گھنٹے دوران اک ہور ہسپتال تے مسجد نوں نشانہ بنایا ، مغربی علاقے وچ واقع ہلال احمر دے ہیڈ کوارٹر تے القدس ہسپتال دے نیڑے دے علاقے اُتے 30 منٹ تک رہائشی عمارتاں تے سڑکاں اُتے بمباری کیتی گئی ، بماں دے ٹکڑے ہلال احمر دے ہیڈکوارٹر وچ وی ڈِگے، فلسطینی وزارت صحت دے مطابق القدس ہسپتال وچ8ہزار پناہ گزین موجود نیں۔میڈیا رپورٹس دے مطابق الشفا ہسپتال دے نواحی علاقے نوں وی بمباری دا نشانہ بنایاگیا جس وچ وڈھے پیمانے اُتے شہادتاں ہویاں ۔ غزہ دے جبالیہ پناہ گزین کیمپ وچ 2 گھراں اُتے اسرائیلی فضائیہ ولوں بمباری کیتی گئی، اک واقعے وچ27 تے دُوجے وچ اک ہی خاندان دے13 افراد شہید تے 15 زخمی ہوئے۔واضح رہے کہ 7اکتوبرنوں حماس ولوں الاقصی آپریشن دا شروع کیتا گیا سی، اوس دے بعدوںدوناں پاسیوںاک دُوجے اُتے حملے جاری نیں۔اسرائیل تے فلسطین تنازع دے75 ورھیاںدوران اینہاں حملیاں نوں بدترین قرار دتاجارہیا اے۔