الیکشن لیٹ کرن دا کیس :الیکشن کمیشن تے وفاقی حکومت نوں نوٹس جاری

اسلام آباد(پنجابی میڈیا گروپ) سپریم کورٹ نے الیکشن کیس وچ الیکشن کمیشن تے وفاقی حکومت نوں نوٹس جاری کردتا۔سپریم کورٹ وچ90دناں وچ عام الیکشن دے انعقاد بارے کیس دی سماعت ہوئی۔چیف جسٹس پاکستان نے پچھیا کہ تُسی درخواست کَدوں دائر کیتی اپنی استدعا اُتے آئو۔صدر سپریم کورٹ بار عابد زبیری نے آکھیا کہ درخواست وچ استدعا کیتی اے کہ الیکشن کمیشن نوں90 دناں وچ الیکشن یقینی بنان دا حکم دتا جائے، مشترکہ مفادات کونسل دا مردم شماری شائع کرن دا آرڈر کالعدم قرار دتا جائے،اسیں 16اگست نوں سپریم کورٹ وچ درخواست دائر کیتی سی، درخواست اُتے نمبر لگ گیا،چھیتی کیس مقرر کرن دی درخواست دے باوجود کیس نہیں سُنیا گیا۔چیف جسٹس نے عابد زبیری نوں آکھیا کہ مینوں اجے آفس ولوں اک نوٹ گھلیا گیا اے، اوس وچ تے لکھیا اے تُسی کَدی کیس دی چھیتی سماعت لئی درخواست ہی دائر نہیں کیتی، تُسی صدر سپریم کورٹ بار ہو کے عدالت نال غلط بیانی کر رہے او۔چیف جسٹس نے آکھیا کہ عام الیکشن بارے درخواست تے انتہائی اہمیت رَکھدی اے، عام الیکشن کیس تے بوہت اہم مقدمہ اے فوری سماعت ہونی چاہیدی سی،ہُن تک تے ایس کیس دا فیصلہ ہو چکیا ہُندا۔جسٹس اطہر من اللہ نے پچھیا کہ کیا مردم شماری دا تعلق الیکشن دے انعقاد نال ہُندااے؟ اوس دی ضرورت کیوں پیش آندی اے؟ کیا ایہ آئین دی لوڑ اے کہ ہر الیکشن توں پہلاں مردم شماری لازمی ہوئے گی؟عابد زبیری نے جواب دتا کہ نہیں ایہ لازمی نہیں اے،پچھلی مردم شماری 2017 وچ ہوئی سی، 5 اگست نوں مشترکہ مفادات کونسل نے مردم شماری جاری کرن دی منظوری دتی، 7اگست نوں اوس دا نوٹیفکیشن جاری ہویا۔چیف جسٹس نے سوال کیتا کہ ایس وچ تے لکھیاسی کہ اوہ عبوری مردم شماری ہوئے گی، 2017 دی مردم شماری تے عبوری سی تے صرف 2018 دے الیکشن لئی سی، کیا اوس دے بعد کوئی حتمی مردم شماری وی ہوئی؟ اگر موجودہ مردم شماری نوں کالعدم قرار دے دتا جائے تے الیکشن 2017 دی مردم شماری تحت ہون گے؟چیف جسٹس نے آکھیا کہ ساہنوں صرف ایس سوال دا جواب دے دیو نویں مردم شماری کالعدم دیو تے الیکشن کس مردم شماری تحت ہون گے، بینادی سوال اک ہی اے، کیا تُسی چاہندے او کہ الیکشن 2017 دی مردم شماری دے مطابق ہون۔عابد زبیری نے دلائل دتے کہ مشترکہ مفادات کونسل وچ کے پی تے پنجاب دے نگران وزرائے اعلی دا رَلتی کرنا غیر آئینی اے۔چیف جسٹس نے آکھیا کہ صدر بار مطابق 3 نومبر نوں الیکشن ہونے چاہیدے نیں ، صدر مملکت نے 6 ستمبر دی تریخ دے دتی تے خود خلاف ورزی کردتی، 23 اگست نوں صدر مملکت نے الیکشن دی تریخ نہیں دتی صرف خط لکھیا۔سپریم کورٹ نے الیکشن کمیشن تے وفاقی حکومت نوں الیکشن کیس وچ نوٹس جاری کردیا ہویاں سماعت ملتوی کردتی۔