اسلام آباد ہائیکورٹ؛ نواز شریف دی نیب ریفرنس وچ سزا خلاف اپیلاں بحال کرن دی درخواست

اسلام آباد( پنجابی میڈیا گروپ) ن لیگ دے قائد نواز شریف نے2 نیب ریفرنس ایون فیلڈ تے العزیزیہ وچ سزا خلاف اپیلاں بحال کرن دیاں متفرق درخواستاں دائر کردتیاں۔سابق وزیراعظم نواز شریف نے اسلام آباد ہائی کورٹ وچ درخواستاں دائر کردیاں ہویاں آکھیاکہ اپیلاں نوں بحال کر کے میرٹ اُتے دلائل سنن دے بعد فیصلہ کیتا جائے۔عدالت نے عدم پیروی اُتے دونوں اپیلاں خارج کر دتیاں سن۔اونہاں نے موقف اختیار کیتا کہ اگرچہ میں اجے تک بیماری توں مکمل ریکور نہیں ہویا ، لیکن ملک دے بدتر معاشی حالات ویکھ کے واپس آن دا فیصلہ کیتا ، ایون فیلڈ ریفرنس وچ احتساب عدالت نے 6 جولائی 2018 نوں غیرحاضری وچ سزاسنائی، اوس ویلے میری گھر والی لندن وچ زیرعلاج تے وینٹی لیٹر اُتے سی، فیصلہ سنان دے اعلان وچ تاخیر دی استدعا کیتی سی جیہڑی منظورنہیں ہوئی، سزا دا فیصلہ غیرحاضری وچ سنایا گیا تے پاکستان واپس آ کے جیل دا سامنا کیتا تے اپیلاں دائر کیتیاں۔