ارشد شریف دے کینیا وچ قتل نوں اک وَرھا لَنگ گیا، غم اجے وی تازہ

لہور( پنجابی میڈیا گروپ)سینئر صحافی ارشد شریف دے کینیا وچ قتل نوں اک وَرھا لَنگ گیا لیکن غم اجے وی تازہ اے ۔صحافی ارشد شریف نوں 1ورھے پہلاںاج ہی دے دن کینیا وچ اک مبینہ پلس مقابلے دوران قتل کر دتا گیا سی۔23اکتوبر2022 نوں کینیا دے شہر نیروبی وچ مگاڈی ہائی وے اُتے پیش آن والے ایس واقعے نوں بعد وچ کینیا دی پلس ولوں غلط شناخت دا واقعہ قرار دتا گیا لیکن ارشد شریف دے قتل کیس دی تحقیقات وچ کینیا پلس دے موقف وچ تضاد پایا گیا۔پلس دا ابتدائی موقف سی کہ اوہ مغوی بال دی بازیابی لئی ایتھے موجود سن جَد کہ مقامی تفتیش کاراں دا کہنا اے کہ جس طرح گڈی اُتے گولیاں لگیاں نیں اوس نال لگدا نہیں اے کہ ایہ چلدی گڈی اُتے ماریاں گئیاں نیں۔دُوجے پاسے ارشد شریف دے قتل وچ ملوث کینیا پلس دے پنجاں اہلکاراں نوں بحال ہون دے بعد ڈیوٹی اُتے واپس گھل دتا گیا اے۔ذرائع مطابق پنجاں پلس اہلکاراں نوں انکوائری وچ بے گناہ قرار دے دتا گیا جدکہ2اہلکاراں نوں سینئر رینک اُتے ترقی وی دے دتی گئی۔اودھر پاکستانی سپریم کورٹ نے صحافی ارشد شریف دے قتل اُتے ازخود نوٹس وی لئیا سی لیکن کئی سماعتاں دے باوجود کیس کسی فیصلے اُتے نہ پہنچ سکیا۔