ایندھن دا بدترین بحران، پی آئی اے دیاں ہور27پروازاں منسوخ

کراچی(پنجابی میڈیا گروپ)قومی ایئرلائن وچ ایندھن دی فراہمی دا بدترین بحران جاری اے،اج وی پی آئی اے نے ہور27پروازاں منسوخ کردتیاں۔پی آئی اے دی کراچی توں لہور، رحیم یارخان تے پشوردی دو طرفہ7پروازاں منسوخ کردتیاں گئیاں جدکہ کراچی توں ملتان، دبئی تے اسلام آباد دیاں6پروازاں منسوخ نیں ۔ملتان توں جدہ تے القسیم،2پروازاں وی منسوخ کردتیاں گئیاں جدکہ لہور شارجہ، دبئی تے جدہ لہور دیاں4پروازاں وی منسوخ نیں ۔اسلام آباد توں دبئی، دمام، مدینہ تے جدہ دیاں4پروازاں منسوخ نیں ۔ایسی طرح اسلام آباد توں ابوظہبی تے کوئٹہ دیاں3پروازاں وی منسوخ کردتیاں گئیاں جدکہ دبئی توں پشور دی پرواز وی منسوخ کر دتی گئی اے ۔ ایس حوالے نال ترجمان پی آئی اے دا کہنا اے کہ اج پی آئی اے دیاں 60 پروازاں شیڈول نیں، 42 بیرون ملک تے 18 اندرون ملک چلایاں جان گیاں ۔ ترجمان نے ہور دسیا کہ میسر فیول وچ بیرون ملک آپریشن نوں ترجیح بنیاداں اُتے جاری رکھیا جارہیا اے۔واضح رہے کہ پچھلے دناں وی ملک بھر توں20 توںوَدھ پروازاں منسوخ کیتیاں گئیاں سن۔