عدالت کسی دے الیکشن وچ حصہ لین اُتے پابندی لگادیوے تے تسلیم کرنا ہوئے گا، نگران وزیراعظم

اسلام آباد( پنجابی میڈیا گروپ) نگران وزیراعظم انوار الحق کاکڑ نے آکھیا اے کہ کیا لیول پلیئنگ فیلڈ صرف اک مخصوص جماعت نوں جتوان دا نام اے تے2018 دی لیول پلیئنگ فلیڈ یاد اے جَد جنوبی پنجاب محاذ بنیا سی۔اسلام آباد وچ پریس کانفرنس کردیاں ہویاں نگران وزیراعظم نے آکھیا کہ حالیہ دورہ چین وچ چین دے صدر نال ملاقات انتہائی مثبت رہی، پاکستان پرعزم اے کہ حالیہ ملاقات بعدسی پیک داتسلسل جاری رہے گا، امیداے کہ آن والی حکومت منصوبیاں داتسلسل جاری رکھے گی، چین دے نال ہون وال سمجھوتیاں داتواترپاکستان دے مفادوچ اے۔اونہاں دا کہنا سی کہ الیکشن دی تریخ دا بوہت چھیتی اعلان ہو جائے گا، فیر اسیں ووٹ پانے جاواں گے۔اک سوال دے جواب وچ انوار الحق کاکڑ نے آکھیا کہ کوئی کسی وی پارٹی وچ جانا چاہے اوس دی مرضی اے، لیول پلیئنگ فیلڈ اک مخصوص جماعت نوں ، جیہڑا بوہت سارے لوکاں دی ترجیح وی اے، جتوان لئی محول بنان دا نام اے تے میں کجھ نہیں کرسکدا، 2018 دی لیول پلیئنگ فلیڈ یاد اے جَد جنوبی پنجاب محاذ بنیا سی، فیر اوس محاذدا نتیجہ کیہ نکلیا۔نگراں وزیراعظم نے آکھیا کہ ساڈھا کم صرف الیکشن دے عمل وچ معاونت کرنا اے، کوشش کرنی اے کہ ساریاں جماعتاں نوں ساڈھے معیار مطابق اک نام نہاد لیول پلیئنگ فیلڈ ملے، اوس اُتے اعتراض وی ہون گے، لوگ اوس نوں اپنے مطابق قابل قبول نہیں سمجھن گے۔