آئی پی پی نے فوجی عدالتاں خلاف سپریم کورٹ دا فیصلہ قومی سلامتی دے برعکس قراردے دتا

لہور(پنجابی میڈیا گروپ)استحکام پاکستان پارٹی نے فوجی عدالتاں وچ سویلینز دا ٹرائل کالعدم قرار دین دے سپریم کورٹ دے فیصلے نوں قومی سلامتی تے قومی مفادات دے برعکس قرار دے دتا اے۔آئی پی پی دی ترجمان فردوس عاشق اعوان دا کہنا سی کہ ملک دشمن عناصر تے غیر ملکی ایجنڈیاں اُتے کم کرن والیاں نال آہنی ہتھاں نال نمٹنا ضروری اے ۔اونہاں نے آکھیا کہ ماضی وچ ایسا قنون نہ ہون پاروں غیر ملکی ایجنٹاں خلاف مضبوط فیصلے نہ کیتے جا سکے۔دُوجے پاسے آئی پی پی رہنما فیاض الحسن چوہان نے سپریم کورٹ دے فیصلے نوں متنازعہ قرار دیندیاں ہویاں آکھیا کہ پاکستان وچ ملٹری کورٹس وچ آرمی ایکٹ 1952 تحت سینکڑاں سویلینز دے مقدمے چل چکے نیں۔اونہاں نے آکھیا کہ تحریک انصاف دے دور حکومت وچ وی 29 سویلینز دے ملٹری کورٹس وچ مقدے چلے سن۔خیال رہے کہ سپریم کورٹ نے فوجی عدالتاں وچ سویلین دے ٹرائل خلاف درخواستاں منظور کردیاں ہویاں ملٹری کورٹ وچ سویلین دا ٹرائل کالعدم قرار دے دتا۔