فرانسیسی صدر اظہار یکجہتی لئی اسرائیل اپڑگئے

پیرس( پنجابی میڈیا گروپ)فرانس دے صدر ایمانوئل میکرون اسرائیل اپڑ گئے تے اپنے ہم منصب نال ملاقات وچ حماس دے حملے وچ یہودیاں دیاں ہلاکتاں اُتے تعزیت کیتی تے حماس خلاف جنگ وچ تعاون دا یقین دلایا۔ عالمی خبر رساں ادارے مطابق حماس تے اسرائیل دیاں جھڑپاں دے 2 ہفتے بعد فرانس دے صدر ایمانوئل میکرون اج اسرائیل اپڑ گئے۔فرانسیسی صدر نے اسرائیل دے صدر نال ملاقات کیتی تے اَت گردی خلاف جنگ وچ اسرائیل دی مکمل حمایت دا یقین دلایا۔فرانسیسی صدر نے فلسطین اتھارٹی محمود عباس نال وی ملاقات کیتی تے اوہ اج یا کل کسی ویلے اسرائیلی وزیر اعظم نیتن یاہو نال وی ملاقات کرن گے۔یاد رہے کہ 7اکتوبر نوں حماس دے اسرائیل اُتے حملے وچ ہلاک ہون والیاں وچ30فرانسیسی شہری وی شامل سن جَد کہ اک عورت سنے7 فرانسیسی شہریاں نوں یرغمال بنالیا گیا سی جیہڑا تاحال لاپتا نیں۔