فلسطین دی جنگ آزادی نوں اَت گردی نال جوڑنا نادانی اے،آرمی چیف

اسلام آباد(پنجابی میڈیا گروپ)آرمی چیف جنرل عاصم منیرہوراںآکھیا اے کہ عالمی برادری اسرائیلی فوج دے فلسطین اُتے طاقت دے استعمال نوں روکے، فلسطین دا دارالحکومت القدس الشریف اے ایس آزادی دی جنگ نوں اَت گردی نال جوڑنا نادانی اے۔آئی ایس پی آر مطابق آرمی چیف جنرل سید عاصم منیر نے پاکستان وچ فلسطین دے سفیر احمد جواد ربیع نال ملاقات کیتی تے غزہ وچ جاری جنگ اندر فلسطینیاں دی شہادت اُتے تعزیت دا اظہارکیتا۔آرمی چیف نے آکھیا کہ جنگ وچ اسرائیلی ڈیفنس فورسزہتھوں بے گناہ شہریاں اُتے تشدد تے اندھا دھند ہلاکتاں اُتے گہری تشویش اے، شہری آبادی، تعلیمی و امدادی کارکناں، اسپتالاں اُتے مسلسل حملے قابل مذمت نیں، غزہ توں فلسطینیاں دی جبری بے دخلی انسانیت دے خلاف صریح جرم اے۔آرمی چیف نے 1967 توں پہلاں دیاں سرحداں دی بنیاد اُتے قائم ہون والی آزاد ریاست فلسطین لئی پاکستان دی اصولی حمایت دا عہدکیتا تے آکھیا کہ فلسطین دا دارالحکومت القدس الشریف اے، غزہ وچ تشدد دی تازہ لہر جبر، انسانی حقوق دی مسلسل خلاف ورزیاں تے ریاستی سرپرستی وچ مسجد اقصی دی بے حرمتی دا نتیجہ اے، ایس جنگ نوں اَت گردی نال جوڑنا نادانی ہوئے گی۔آرمی چیف نے آکھیا کہ ایس نازک موڑاُتے ایہ ضروری اے کہ بین الاقوامی برادری اسرائیلی ڈیفنس فورس ولوں طاقت دے غیر متناسب تے غیر قنونی استعمال پاروں رونما ہون والے انسانی المیے نوں چھیتی توں چھیتی ختم کرن لئی حرکت وچ آئے، انسانی حقوق دی ایس صریح خلاف ورزی وچ مظالم نوں جاری رکھن دی حوصلہ افزائی کرن توں باز رہے۔