شہباز شریف نوں نیب گرفتاری دا خدشہ، عبوری ضمانت لئی عرضی دائر کر دتی

لہور: اپوزیشن لیڈر شہباز شریف نے آمدن توں ودھ اثاثے تے منی لانڈرنگ کیس وچ متوقع گرفتاری توں بچن لئی لہور ہائی کورٹ وچ عبوری ضمانت لئی عرضی دائر کر دتی۔

مسلم لیگ (ن) دے صدر شہباز شریف ولوں عرضی وچ آکھیا گیا اے نیب ولوں زیر التوا انکوائری وچ گرفتار کیتے جان دا خدشہ اے، تواتر نال سارے اثاثے ڈکلیئر کردا آ رہیا آں، نیب نے بدنیتی دی بنیاد تے آمدن توں ودھ اثاثیاں دا کیس بنایا اے۔ شہباز شریف نے عرضی امجد پرویز ایڈووکیٹ دی وساطت نال دائر کیتی۔

شہباز شریف نے درخواست وچ نیب تے سوالات کردیاں آکھیا کہ 2018ءوچ گرفتاری دے دوران نیب نے اختیارات دے ناجائز استعمال دا اک وی ثبوت ساہمنے نہیں رکھیا، نیب اجہے کیس وچ اپنے اختیار دا استعمال نہیں کر سکدا جہدے وچ کوئی ثبوت موجود نہ ہووے، منی لانڈرنگ دے الزامات وی بالکل بے بنیاد نیں۔