بابر اعظم نے قومی ٹیم دی کپتانی توں استعفی دے دتا

لہور(پنجابی میڈیا گروپ)قومی کرکٹ ٹیم دے کپتان بابر اعظم نے ورلڈ کپ وچ ناقص کارکردگی دا اعتراف کر دیاںہویاں تیناں فارمیٹاں دی کپتانی توں استعفے دا اعلان کر دتا۔سماجی رابطے دی ویب سائٹ ایکس (ٹوئٹر) اُتے اپنے پیغام وچ بابر اعظم نے آکھیا کہ مینوں اوہ لمحہ چنگی طرح یاد اے جَد مینوں پی سی بی ولوں2019 وچ پاکستان دی قیادت کرن دی کال موصول ہوئی۔اونہاں نے آکھیا کہ پچھلے4 ورھیاں وچ، میں میدان اندر تے باہر بوہت عروج و زوال ویکھے لیکن میرا مقصد پورے خلوص و جذبے دے نال پاکستان دے وقار تے عزت نوں برقرار رکھنا اے۔بابر اعظم نے آکھیا کہ وائٹ بال فارمیٹ وچ نمبر1 اُتے پہنچنا ساریاں کھیڈاریاں، کوچ تے انتظامیہ دی اجتماعی کوششاں دا نتیجہ سی، میں ایس دوران شائقین کرکٹ ولوں اپنی پرجوش حمایت دا شکریہ ادا کردا ہاں۔اونہاں نے آکھیا کہ اج میں ساریاں فارمیٹاں توں پاکستان دی کپتانی چھڈ رہیا ہاں، ایہ اک مشکل فیصلہ اے لیکن مینوں لگدا اے کہ ایس لئی ایہ صحیح ویلا اے۔ بابر اعظم نے آکھیا کہ میں تیناں فارمیٹاں وچ بطور کھیڈاری پاکستان دی نمائندگی کردا رہواں گا، میں نویں کپتان تے ٹیم دے نال اپنی حمایت تے تجربہ شیئر کرن لئی موجود رہواں گا۔اونہاں نے آکھیا کہ کپتانی دی ایہ اہم ذمہ داری سونپن اُتے میں پاکستان کرکٹ بورڈ دا تہہ دل نال شکریہ ادا کردا ہاں، پاکستان زندہ باد۔