نوجواناں تے اقلیتاں نوں سیاست دی پہلی صف وچ لیانا چاہندے ہاں، مریم نواز

لہور(پنجابی میڈیا گروپ)پاکستان مسلم لیگ(ن) دی سینئر نائب صدر تے چیف آرگنائزر مریم نواز نے آکھیا اے کہ نوجواناں تے اقلیتاں نوں سیاست دی پہلی صف وچ لیاناچاہندے ہاں۔مریم نواز دی زیرصدارت اجلاس ہویا،جس وچ مسلم سٹوڈنٹس فیڈریشن (ایم ایس ایف) تے مینارٹی ونگ دے عہدیداراں تے کارکناں نے رَلت کیتی،اجلاس وچ 8فروری دے عام الیکشن دے حوالے نال ایم ایس ایف تے مینارٹی ونگ دی کارکردگی دا جائزہ لئیا گیا۔اجلاس وچ ایم ایس ایف تے مینارٹی ونگ دی کارکردگی اُتے اطمینان دا اظہار کیتا گیا، اجلاس وچ عام الیکشن وچ نوجواناں تے مینارٹی ونگ دی بھرپوررَلت توں یقینی بنان دی تاکید کیتی گئی۔مسلم لیگ ن دے اجلاس وچ ملک بھر وچ انتخابی سرگرمیاں تیز کرن دا فیصلہ کیتا گیا، وفاق سنے چاراں صوبیاں، گلگت بلتستان تے آزاد جموں وکشمیر وچ نوجواناں نوں متحرک کرن دا وی فیصلہ کیتا گیا۔اجلاس نال خطاب کردیاں ہو یاں مریم نواز نے آکھیا کہ سیاست وچ نوجواناں تے اقلیتاں دے کردار وچ بتدریج اضافہ کراں گے، نوجوان ملک دا سرمایہ نیں، نوجواناں دی ترقی ملک دی ترقی اے، ایم ایس ایف دے پلیٹ فارم توں ملک بھروچ نوجواناں نوں عملی سیاست وچ شمولیت دا موقع ملے گا۔مریم نواز نے آکھیا کہ2024 پاکستان تے عوام لئی نویں امید، ترقی دا نوا دور لے کے آ رہیا اے، نوازشریف دی قیادت وچ نویں سال توں پاکستانی معشیت ترقی دا تیز رفتار دور شروع ہوئے گا،انشااللہ