شمالی غزہ وچ2 سکولاں اُتے بمباری،50 توں وَدھ پناہ گزین فلسطینی شہید

غزہ( پنجابی میڈیا گروپ)غزہ اُتے اک وار فیراسرائیلی جارحیت جاری اے، صیہونی فوج دی شمالی غزہ وچ2سکولاں اُتے بمباری نال50 توں وَدھ پناہ گزین فلسطینی شہید ہوگئے۔عالمی میڈیا مطابق اسرائیلی طیاریاں نے شمالی غزہ دے علاقے الدرج دے2سکولاں نوں نشانہ بنایا، حملے وچ50 توں وَدھ پناہ گزین فلسطینی شہید جدکہ سینکڑاں زخمی ہوئے نیں، سکولاں وچ بے گھر فلسطینیاں نے پناہ لئی ہوئی سی۔رپورٹ مطابق اسرائیلی فوج نے بیت لاحیہ، خان یونس، شجاعیہ تے رفاہ وچ وی فلسطینیاں دیاں پناہ گاہواں، سکولاں، تجارتی مال تے رہائشی عمارتاں اُتے وی بمباری کیتی۔صیہونی فورسز نے غزہ سپریم کورٹ دی عمارت وی تباہ کردتی، ہسپتال تے ایمبولینساں نوں وی نشانہ بنایا۔دُوجے پاسے غزہ وچ اسرائیلی فوج دے حملیاں وچ شدت آ گئی اے، 2دناں وچ800 توںوَدھ فلسطینی شہید ہوگئے،ہُن تک اسرائیلی بمباری وچ شہید ہون والیاں دی مجموعی تعداد16ہزار توں وَدھ گئی اے۔اسرائیلی فوج نے24گھنٹیاں وچ حماس دے سینکڑاں ٹھکانیاں نوں نشانہ بنان دا دعوی کیتا اے، اسرائیل نے مین فائبر روٹس کٹ دتیاں، غزہ وچ لینڈلائن، موبائل تے انٹرنیٹ سروس اک وار فیر معطل ہوگئی اے۔