مینوں ہٹا کے کسی لاڈلے نوں لیان لئی پاکستان نوں سزا کیوں دتی گئی، نوازشریف

لہور( پنجابی میڈیا گروپ)پاکستان مسلم لیگ(ن) دے قائد نواز شریف نے آکھیا اے کہ میرے خلاف جھوٹے مقدمے بنائے گئے سن، اپنا معاملہ اللہ اُتے چَھڈ دتا سی جس نے مینوں سرخرو کیتا۔ قوم نال خطاب کردیاں سابق وزیراعظم تے ن لیگ دے قائد نے آکھیا کہ میرے خلاف مقدمیاں دے فیصلیاں نال جھوٹ دی قلعی کُھل گئی۔ اللہ دا شکر اے کہ اوس نے مینوں سرخرو کیتا، عدالت نے مینوں ہر الزام توں بری کردتا۔نواز شریف نے آکھیا کہ مینوں بیٹے توں تنخواہ نہ لین اُتے وزارت عظمی توں ہٹایا گیا، نیب نوں میرے خلاف3 ریفرنس دائر کرن لئی آکھیا گیا، مینوں سسلین مافیا تے گاڈ فادر دیاں گالیاں دتیاں گئیاں، مگر ایس شرمناک کھیڈ دے سارے چہرے بے نقاب ہوچکے۔اونہاں نے آکھیا کہ سب کہہ رہے کہ تہاڈا کیہ قصور سی، عوام دیاں دعاواں نے ہمیشہ مینوں حوصلہ دتا، اوتھوں اوتھوں گواہیاں آرہیاں نیں جیتھوں دا گمان وی نہیں سی۔سابق وزیراعظم نے آکھیا کہ مینوں ہٹا کے کسی لاڈلے نوں لیان لئی پاکستان نوں سزا کیوں دتی گئی۔ دشمنی تے نواز شریف نال سی ، اوس نوں جیل وچ وی سُٹیا گیا سی مگر عوام نوں کیوں سزادتی گئی۔ عوام دے چولہے کیوں ویچھا دتے گئے۔ محنت کشاں تے کساناں دیاں زندگیاں کیوں عذاب بنادتیاں گئیاں۔نواز شریف نے سوال کیتا کہ ایس پاکستان نوں کس نے تباہ کیتا جیہڑا آئی ایم ایف دے قرضیاں توں آزاد ہوچکیا سی تے میرے دور وچ6 فیصد دی شرح نال ترقی کررہیا سی، لوڈ شیڈنگ ختم ہوگئی سی، سی پیک دی شکل وچ50 ارب ڈالر دی سرمایہ کاری آئی سی۔قائد ن لیگ نے آکھیا کہ نواز شریف خواب تے سبز باغ نہیں وکھاندا، میں جو کہندا ہاں اللہ دے فضل و کرم نال کر کے وکھاندا ہاں، مینوں کَدی چنگے حالات نہیں ملے مگر جَد وی مینوں فارغ کیتا گیا میں ملک نوں بوہت چنگی حالت وچ چھڈ کے گیا۔اونہاں نے آکھیا کہ سچی خوشی اوس ویلے ہوئے گی جَد عوام دیاں سزاوااں مُکن گیاں۔ جَد اونہاں نوں مہنگائی دے عذاب توں نجات ملے گی، جَد نوجواناں نوں روزگار ملے گا تے بیماراں نوں دواواں ملن گیاں۔میاں نواز شریف نے عوام نال مخاطب ہو کے آکھیا کہ تُسی خود جج او تے مینوںامید اے کہ تُسی 8فروری نوں اپنا فیصلہ سناو گے، تے اپنیاں سزاواں ختم کرو گے۔