شاہ محمود قریشی اڈیالہ جیل توں رہائی بعد جی ایچ کیو حملہ کیس وچ گرفتار

راولپنڈی(پنجابی میڈیاگروپ)سابق وزیر خارجہ شاہ محمود قریشی نوں اڈیالہ جیل توں رہا ہون دے فوری بعد دوبارہ گرفتار کر لیا گیا۔پاکستان تحریک انصاف (پی ٹی آئی) دے مرکزی رہنما شاہ محمود قریشی نوں راولپنڈی پلس نے اڈیالہ جیل دے باہروں گرفتارکیتا تے بکتر بند گڈی وچ لے کے نامعلوم مقام وَل روانہ ہو گئی۔یاد رہے کہ پنجاب پلس دی بھاری نفری تے تھانہ آر اے بازار پلس شاہ محمود قریشی دی گرفتاری لئی اڈیالہ جیل پہنچی سی۔واضح رہے کہ پچھلے دن ڈپٹی کمشنر راولپنڈی نے سابق وزیر خارجہ شاہ محمود قریشی دی نظربندی دے احکامات جاری کیتے سن۔دُوجے پاسے گرفتاری ویلے گل بات کردیاں ہویاں شاہ محمود قریشی نے آکھیا اے کہ مینوں جھوٹے مقدمے وچ گرفتارکیتا جارہیا اے، میں قوم دی ترجمانی کیتی اے، میں بے گناہ ہاں، مینوں بلاوجہ سیاسی انتقام دا نشانہ بنایا جارہیا اے۔