نواز شریف نوں چوتھی واروزیراعظم بنوا کے ترقی دا سفر دوبارہ شروع کراں گے،شہبازشریف

لہور(پنجابی میڈیاگروپ)پاکستان مسلم لیگ ن دے صدروسابق وزیراعظم شہباز شریف نے آکھیا اے کہ دن رات محنت کرکے نواز شریف نوں چوتھی واروزیراعظم منتخب کراواں گے تے ترقی و خوشحالی دا سفر دوبارہ شروع کراں گے۔پارٹی سیکرٹریٹ وچ پارلیمانی بورڈ دے اجلاس نال خطاب کر دیاں ہویاں صدر ن لیگ شہباز شریف دا کہنا سی کہ نوازشریف دی واپسی بعد پارٹی وچ نوا جوش وولولہ آیا، ہن اسیں الیکشن وَل جارہے ہاں، اللہ نے اگر نوازشریف نوں چوتھی وار موقع دتا تے ترقی و خوشحالی دا سفر دوبارہ شروع کراں گے۔اونہاں نے آکھیا کہ ہندوستان دے ایٹمی دھماکیاں دے جواب وچ نوازشریف نے ملک نوں ناقابل تسخیر بنان دا فیصلہ کیتا ، نوازشریف نوں 5ارب ڈالر دی پیش کش کیتی گئی کہ ایٹمی دھماکہ نہ کرو، نوازشریف نے آکھیا تہاڈی پیش کش دا شکریہ مگر ملک دے وقار خاطر پیش کش قبول نہیں کرسکدا، اللہ دے فضل نال نوازشریف نے پاکستان نوں ایٹمی طاقت بنایا۔