بجلی،علاج مفت،30لکھ گھر بناکے دیاں گے،بلاول بھٹودا10نکاتی منشوردااعلان

لاڑکانہ (پنجابی میڈیاگروپ)چیئرمین پیپلزپارٹی تے سابق وزیر خارجہ بلاول بھٹو زرداری نے 10 نکاتی منشور دا اعلان کردیاں ہویاں آکھیا کہ غریباں لئی 300 یونٹ تک بجلی تے علاج دی سہولت مفت فراہم کراں گے تے30 لکھ گھر بنا کے دیاں گے۔پیپلزپارٹی دے چیئرمین تے سابق وزیر خارجہ بلاول بھٹو زرداری نے بے نظیر بھٹو شہید دی برسی اُتے تقریب نال خطاب کردیاں ہویاں آکھیا کہ اج اسیں بینظیر بھٹو دا16واں یوم شہادت منا رہے ہاں۔چیئرمین پی پی نے آکھیا کہ اج وی پاکستان پیپلزپارٹی دے جیالے گڑھی خدا بخش جمع ہو کے پورے پاکستان نوں اک ہی پیغام گھل رہے نیں زندہ اے بی بی،16ورھے پہلاں کجھ قوتاں نے سوچیا کہ بینظیر بھٹونوں شہید کر کے پیپلزپارٹی ختم کر دین گے، اوہ کساناں، مزدوراں تے طالب علماں دی آواز دبا دین گے۔بلاول بھٹو نے آکھیا کہ شہید نے روٹی، کپڑا تے مکان دا نعرہ دتا سی، زرداری صاحب نے بینظیر انکم سپورٹ پروگرام دتا، ایہ ساریاں ساڈھیاں کامیابیاں نیں، جس مشکل وچ پاکستان کھڑا اے ہُن ویلا آ گیا اے ایس ملک وچ پیپلزپارٹی دی حکومت بنا یئے، ایس ویلے مہنگائی، غربت، بیروزگاری دا حل شہید ذوالفقارعلی بھٹو دے منشور وچ موجود اے۔چیئرمین پی پی نے آکھیا کہ اسیں الیکشن لڑنا جان دے ہاں تے اج وی تیار ہاں، ایہ ساڈھا ہی مطالبہ سی کہ الیکشن کرائو، اسیںچا ہندے ہاں الیکشن ہون تاکہ دودھ دا دودھ پانی دا پانی ہوجائے، اسیں اونہاں وچوں نہیں جیہڑے الیکشن دی تریخ اگے ودھاندنے نیں تے کاغذات نامزدگی کھو کر نَس دے نیں اوس واروی اسیں ڈٹ کے لڑاں گے تے جتاں گے۔اونہاں دا کہنا سی کہ باقی دیاں سیاسی جماعتاں لئی پیغام اے کہ اوہ آئیں تے الیکشن لڑ ن، کجھ جماعتاں اج وی کسی ہور دے کندھیاں اُتے سیاست کررہیاں نیں، پرانے سیاست دان پرانی سیاست کررہے نیں مگر اسیں نفرت دی پرانی سیاست دفن کراں گے۔بلاول بھٹو نے آکھیاکہ ساڈھی حکومت بنی تے غریباں لئی300 یونٹ تک بجلی مفت فراہم کراں گے، بر بال نوں تعلیم تک رسائی حاصل ہوئے گی، 5 سالہ دور وچ تنخواہواں نوں دُگنا کرنا ترجیح ہوئے گی، غریباں نوں 30لکھ گھر بناکے دیاں گے، یوتھ کارڈ ذریعے نوجواناں نوں اک سال تک مالی امداد دیاں گے۔سابق وزیر خارجہ نے آکھیا کہ پبلک پرائیویٹ پارٹنر شپ تحت پورے ملک وچ صحت دا مفت نظام متعارف کراواں گے، ہر ضلع وچ گرین انرجی دے نام اُتے پارک کھو لاں گے، بینظیر انکم سپورٹ پروگرام ونگوںکسان کارڈ وی لیاواں گے۔بلاول بھٹو نے بھُک مٹا کے پروگرام شروع کرن دا اعلان کیتا تے آکھیا کہ ایس پروگرام ذریعے اسیں غربت تے بے روزگاری دا مقابلہ کراں گے،اسیں 3 نسلاں توں غربت تے بے روزگاری دامقابلہ کردے آئے ہاں۔سابق وزیر خارجہ نے آکھیا کہ اسیں کسی امتحان توں پیچھے نہیں نَسے ، اج جس مشکل وچ پاکستان اے اوس لئی سنجیدگی دی لوڑ اے، اگر اسیں مہنگائی دا مقابلہ کرنا اے، ساہنوں اَت گرداں دا مقابلہ کرنا اے تے آپس دے جھگڑیاں نوں چھڈنا پئے گا، جیہڑے پرانے سیاستدان نیں اوہ اج وی وَنڈ دی سیاست کررہے نیں۔چیئرمین پی پی نے آکھیاکہ حکومت وچ آئے تے غریب لو کاں نوں سولر دیاں گے تاکہ اونہاں دے بلاں دا مسئلہ حل ہوجائے، ہرضلع وچ اسیں سولر ذریعے بجلی پہنچاواں گے، اسیں تعلیمی اداریاں نوں فعال کرنا اے، مفت صحت دا نظام پورے ڈسٹرکٹ تک پہنچاواں گے، حکومت وچ آ کے ساریاں کچی آبادیاں نوں مالکانہ حقوق دیاں گے۔اونہاں نے ہورآکھیا کہ کسان خوشحال تے ملک خوشحال، میں کسان کارڈ دیاں گا، اسیں کساناں نوں ڈائریکٹ سبسڈی دلواواں گے، اسیں مزدوراں نوں رجسٹرڈ کراواں گے، گھراں تے دکاناں وچ کم کرن والے مزدوراں نوں سپورٹ کراں گے، بلوچستان دی عوام نوں پیغام دیندا ہاں کہ ییپلزپارٹی نے صوبہ بنایا تے تہانوں حق دلایا، صوبے دی ترقی ساڈھی ترجیح ہوئے گی، میرا پختونخوا لئی پیغام اے تُسی سلیکٹڈ دا تے اَت گردی دا مقابلہ کیتا، اسیں تہاڈی ترقی دا بندوبست کراں گے۔