الیکشن لڑن دی اہلیت مطابق تے قائداعظم وی نااہل ہو جاندے،چیف جسٹس

اسلام آباد(پنجابی میڈیاگروپ)چیف جسٹس آف پاکستان جسٹس قاضی فائز عیسی نے آکھیا اے کہ الیکشن لڑن دی اہلیت دے مطابق تے قائداعظم وی نااہل ہو جاندے۔چیف جسٹس آف پاکستان جسٹس قاضی فائز عیسی دی سربراہی وچ سپریم کورٹ دے7رکنی لارجر بنچ نے تاحیات نااہلی کیس دی سماعت کیتی۔عدالت عظمی دے لارجر بنچ وچ چیف جسٹس آف پاکستان دے علاوہ جسٹس منصور علی شاہ، جسٹس یحیی آفریدی، جسٹس امین الدین خان، جسٹس جمال خان مندوخیل، جسٹس محمد علی مظہر تے جسٹس مسرت ہلالی وی شامل سن۔سماعت دے شروع اُتے اٹارنی جنرل عدالت وچ پیش ہوئے تے آکھیا کہ آرٹیکل62ون ایف تحت نااہلی دی سزا5سال کرن دی قنون سازی نوں سپورٹ کر رہے نیں۔اٹارنی جنرل نے آکھیا کہ تاحیات نااہلی دے فیصلے اُتے نظر ثانی ہونی چاہیدی اے، اونہاں نے آرٹیکل62 ون ایف تحت تاحیات نااہلی دی تشریح دے فیصلے دے دوبارہ جائزے دی استدعا کردتی۔چیف جسٹس نے استفسار کیتا کہ اٹارنی جنرل! تہاڈا موقف کیہ اے کہ الیکشن ایکٹ چلنا چا ہیدا اے یا سپریم کورٹ دے فیصلے؟ جس اُتے اٹارنی جنرل نے جواب دتا کہ عدالت توں درخواست اے کہ تاحیات نااہلی دے فیصلے دا دوبارہ جائزہ لئے، الیکشن ایکٹ دی تائید کراں گا کیوں کہ ایہ وفاق دا بنایا گیا قنون اے۔دوران سماعت میر بادشاہ قیصرانی دے خلاف درخواست گزار دے وکیل ثاقب جیلانی نے وی تاحیات نااہلی دی مخالفت کردتی۔وکیل نے آکھیا کہ میں نے2018 وچ درخواست دائرکیتی جَد62 ون ایف تحت تاحیات نااہلی دا فیصلہ آیا، ہُن الیکشن ایکٹ وچ سیکشن232 شامل ہوچکیا اے اوس لئی تاحیات نااہلی دی حد تک استدعا دی پیروی نہیں کررہیا۔چیف جسٹس نے استفسار کیتا کہ الیکشن ایکٹ 2017 نوں کیا کسی نے عدالت وچ چیلنج کیتا؟ جس اُتے درخواست گزار ولوں عدالت نوں دسیا گیا کہ الیکشن ایکٹ نوں کَدی وی کسی دے عدالت وچ چیلنج نہیں کیتا، چیف جسٹس نے پچھیا کہ کیا کوئی ایسی صوبائی حکومت اے جیہڑی الیکشن ایکٹ 2017 دی مخالفت کرے، جس اُتے صوبائی ایڈووکیٹ جنرل نے عدالت وچ موقف دتا کہ ساریاں صوبائی حکومتاں الیکشن ایکٹ 2017 نوں سپورٹ کر رہیاں نیں۔ایس موقع اُتے اٹارنی جنرل نے آئین دا آرٹیکل 62،63 پڑھ کے سنادتا، اٹارنی جنرل نے رکن پارلیمنٹ بنن لئی اہلیت تے نااہلی دیاں ساریاں آئینی شرطاں پڑھ کے سنا دتیاں، اٹارنی جنرل نے دسیا کہ کاغذات نامزدگی ویلے توں62 تے 63 دوناں شرطاں ویکھیاں جاندیاں نیں، انٹری پوائنٹ اُتے دونوں آرٹیکل لاگو ہُندے نیں۔