آزادالیکشن نتیجے توں وَدھ اہم اے،سپریم کورٹ

اسلام آباد(پنجابی میڈیاگروپ)سپریم کورٹ نے آکھیا اے کہ آزادانہ تے منصفانہ الیکشن دا انعقاد نتیجے توں وَدھ اہم اے، الیکشن جمہوری اصولاں مطابق کرائے جان جیہڑے اثر ورسوخ تے جبر توں پاک ہون تے ساریاں جماعتاںنوں مساوی موقع ملن۔سپریم کورٹ نے پی ٹی آئی دی لیول پلینگ فیلڈ لئی درخواست اُتے تحریری فیصلہ جاری کردتا جس وچ آکھیا گیا اے کہ الیکشن وچ خلل پائیوں بغیر الیکشن کمیشن شکایتاں دورکرے، دیانت داری نال منصفانہ الیکشن کرانا الیکشن کمیشن دی ذمہ داری اے۔فیصلے وچ آکھیا گیا اے کہ منصفانہ الیکشن منتخب حکومت نوں قنونی حیثیت فراہم کردے نیں، شفاف الیکشن جمہوری عمل اُتے عوام دااعتماد برقرار رکھدے نیں، صحت مند مقابلے لئی برابری دا میدان ضروری اے، الیکشن جبری دی بجائے عوام دی رضا دے حقیقی عکاس ہونے چا ہیدے نیں۔سپریم کورٹ نے آکھیا اے کہ آزادانہ تے منصفانہ الیکشن دا انعقاد نتائج توں وَدھ اہم اے الیکشن کمیشن جمہوری عمل وچ اہم کردار ادا کردااے، الیکشن کمیشن دی ذمہ داری اے الیکشن نوں بدعنوانی توں بچائے، آئین دے آرٹیکل 220 تحت ساریاں ایگزیکٹو اتھارٹیاں الیکشن کمیشن دی معاونت دے پابند نیں۔فیصلے وچ آکھیا گیا اے کہ الیکشن جمہوری اصولاں مطابق کرائے جان جیہڑے اثر ورسوخ تے جبر توں پاک ہون، الیکشن کمیشن یقینی بنائے ساریاں جماعتاں نوں الیکشن وچ مساوی موقع ملے، جمہوریت دی کامیابی لئی ووٹراں نوں انتخابی عمل اُتے اعتماد ہونا چا ہیدااے۔