خط لکھن والے ججاںنوں سلام پیش کردا ہاں،عمران خان

اسلام آباد(بیورورپورٹ)بانی پی ٹی آئی عمران خان دا کہنا اے کہ خط لکھن والے ججاںنوں سلام پیش کردا ہاں، خواہش سی فل کورٹ ایس دی سماعت کردا،7ججاں دا بینچ کمیشن توں بہتر اے، شوکت عزیز صدیقی یا اوس توں وی پہلاں دی تحقیقات کرن، بشری بی نوں زہر دتا گیا اونہاںنوں کجھ ہویا تے اسٹیبلشمنٹ ذمہ دار ہوئے گی۔اڈیالہ جیل وچ میڈیا نال گل بات کر دیاں ہویاں اونہاں نے آکھیا کہ اسلام آباد ہائی کورٹ دے ججاں نے جیہڑا خط لکھیا ایہ سب نوں پتا اے کہ جدوں توں رجیم چینج ہوئی ایہ گل اوہدوں توں چل رہی اے،ساریاں6ججاںنوں سیلوٹ کردا ہاں کہ اونہاں نے ہمت کیتی، ساہنوں جج ایہہ پیغام دیندے نیں کہ اوہ بے بس نیں، پلس وی کہندی اے کہ ساڈھے اُتے دبااے، جیل نوں وی آئی ایس آئی کنٹرول کر رہی اے احتساب عدالت دے سابق جج محمد بشیر دبا پاروں 5 وار جیل دے ہسپتال گئے۔عمران خان دا کہنا سی کہ عدت وچ نکاح دا کیس سنن والے جج قدرت اللہ نے وکیلاں نوں دسیا کہ اوس ویلے تک بیٹے دا ولیمہ نہیں کرسکدا جَدوں تک فیصلہ نہ سناواں، سائفر کیس وچ میرا 342 دا بیان ہو رہیاسی جج 10 منٹ لئی باہر گئے تے واپس آ ندیاں ہی فیصلہ سنا دتا، سارے جج باہروں کنٹرول ہو رہے سن۔بانی پی ٹی آئی نے آکھیا کہ عارف علوی ذریعے جنرل عاصم منیرنوں پیغام گھلیا سی کہ مینوں لندن پلان دا علم اے، چیف الیکشن کمشنر لندن پلان اُتے عمل درآمد دا مرکزی کردار سی، نگران حکومت تے الیکشن کمیشن نے مل کے لندن پلان اُتے عمل درآمد کیتا، دھاندھلی دا مقصد پی ٹی آئی ختم کرنا سی، اقتدار وچ بیٹھے لوگ ایجنسیاں دے بغیر اک قدم وی نہیں چُک سکدے، صرف 4 حلقے کھول دین تے حکومت ڈِگ جائے گی،اونہاں دا کہنا سی کہ شکر اے کہ تصدق جیلانی نے کمیشن دی سربراہی توں انکار کیتا تے سپریم کورٹ دا 7 رکنی بینچ بنا دتا گیا، ججاں دا خط لکھنا سنجیدہ معاملہ اے ایس اُتے فل کوٹ نوں سماعت کرنی چاہیدی سی لیکن سپریم کورٹ دے 7 رکنی بینچ دا بننا کمیشن بنن توں بہتر اے۔عمران خان نے آکھیا کہ ایس ویلے پاکستان دے مستقبل دی جنگ چل رہی اے، سابق کمشنر راولپنڈی نوں اجے تک غائب رکھیا گیا اے، وسل بلور نوں تحفظ ملدا اے مگر کمشنر نوں غائب کر دتا جاندا اے، کمشنر راولپنڈی تے فارم 45 اک ہی گل دی نشاندہی کررہے نیں کیوں کہ اوس اُتے تحقیقات نہیں ہوئی؟ وزیر خزانہ تے ایس آئی ایف سی جو مرضی کرلین ملک وچ سرمایہ کاری نہیں آئی کیوں کہ سرمایہ کاراں دا اعتمادمُک گیا اے، ملک وچ معیشت سست روی دا شکار اے ملک تباہی وَل وَدھ رہیا اے۔اونہاں نے آکھیا کہ شوکت عزیز صدیقی دا کیس سپریم جوڈیشل کونسل وچ گیا سی ایس لئی اسیں خاموش رہے، ججاں دے خط دی انکوائری دا آغاز شوکت عزیز صدیقی دے الزاماں یا اوس توں وی پہلاں توں شروع کرلین مینوں کوئی اعتراض نہیں لیکن کرن ضرور۔صحافی نے سوال کیتا کہ شوکت عزیز صدیقی نے جنرل (ر)فیض اُتے الزام لائے سن اوس ویلے تُسی وزیراعظم سو؟ جس اُتے بانی پی ٹی آئی دا کہنا سی کہ جنرل فیض ہو یا کوئی ہور تحقیقات ہونی چا ہیدی، ویسے وی جنرل فیض دی تقرری میں نہیں کیتی سی، جنرل باجوہ نے ساہنوں واضح طور آکھیا سی کہ اگر چپ نہ بیٹھے تے کیس بنائے جان گے تے سزاواں وی ملن گیاں، ڈونلڈ لو نے اپنے آپ نوں تے امریکی حکومت نوں بچان لئی گلاں دی تردید کیتی، اسد مجید نے نیشنل سیکیورٹی کونسل دی میٹنگ وچ آ کے دھمکی دا دسیا سی۔اونہاں داکہنا سی کہ پنجاب وچ فسطائیت اے پرامن احتجاج وی نہیں کرسکدے،مینوں عمرایوب توں جان بوجھ کر کٹ آف کیتا گیا اے تاکہ مشاورت نہ ہوسکے، میری بیوی دے نال جو کیتا گیا اوہ خطرناک اے، شہباز شریف دے خلاف ساریاں گواہو ہارٹ اٹیک پاروں مارے گئے، کجھ مہینیاں وچ سب دی موت ہو گئی، مینوں ڈران لئی بشری بی بی نوں زہر دتا جا رہا اے، بشری بی نوں زہر دیا جائے گا تے کیا میں خموش بیٹھاں گا؟بانی پی ٹی آئی تے بشری بی بی خلاف 190 ملین پانڈ ریفرنس دی سماعت دوران اک ہور گواہ دے بیان اُتے جرح مکمل ہوئی، ریفرنس دی سماعت 6 اپریل تک ملتوی کردتی گئی۔