یوم استحصال کشمیر : پنجاب حکومت دی گورنر ہائوس توں چیئرنگ کراس تک ریلی

لہور:( بھلیکھا ٹی وی ) کشمیریاں نال یکجہتی کرن لئی گورنر ہائوس توں چیئرنگ کراس تک وزیر اعلیٰ پنجاب تے گورنر دی قیادت وچ ریلی کڈی گئی ۔ریلی اندر صوبائی وزیر اں وچ ، فیاض الحسن چوہان ، میاں اسلم اقبال ، ملک نعمان احمد لنگڑیال ، اختر ملک تے ارکان پنجاب اسمبلی سمیت عوام دی وی بوہت وڈی تعدادنے شرکت کیتی ۔صبح 10وجے سائرن وجایا گیا تے اک منٹ لئی خموشی رکھی گئی ، ریلی وچ ملی نغمے تے کشمیر دے ترانے وجدے رہیے۔ ریلی دے شرکاء نے مقبوضہ کشمیر اُتے بھارتی مظالم دی بھرپور انداز وچ مذمت کیتی ، تے کشمیریاں دی جدوجہد آزادی نوں سلام پیش کیتا ۔وزیر اعلیٰ پنجاب نے ریلی وچ شریک ہوون والیاں نال خطاب کر دیاں آکھیا کہ کشمیر پاکستان دی شہ رگ اے ، کشمیریاں دے نال کھڑے آں ، تے ہر سطح اُتے اوہناں دی حمایت کراں گے ، عثمان بزدار نے ڈویژنل ہیڈ کوارٹر وچ اک شاہراہ دا نام سری نگر رکھن دا اعلان کر دتا ۔گورنر پنجاب چودھری محمد سرور نے آکھیا کہ کشمیری دی خصوصی حیثیت ختم کر کے مودی نے ظلم کیتا ۔ مودی دا چہرہ ہر سطح اُتے بے نقاب کر رہیے آں ۔ کشمیر دی آزادی تک جدوجہد جاری رکھاں گے ۔ریلی لئی سیکیورٹی دے سخت انتظامات کیتے گئے سن ، سی سی پی او لہور ذولفقار حمید دے مطابق6ایس پیز تے9ڈی ایس پیز نے سیکیورٹی انتظامات دی نگرانی کیتی ۔ جد کہ31ایس ایچ اوز تے610توں ودھ ملازماں نے ڈیوٹی کیتی ، ٹریفک پولیس دے5ڈی ایس پیز ، 23انسپکٹر تے 200توں ودھ اہلکار تعینات کیتے گئے، انٹری پوائنٹس اُتے واک تھرو گیٹ وی لائے گئے ۔