پاکستان کشمیریاں دی آزادی چاہندا اے، دنیا اکھاں کھول کے بھارت دا ظلم ویکھے: صدر

اسلام آباد: صدر مملکت ڈاکٹر عارف علوی نے اک وار فیر دنیا دے ساہمنے قوم دا عزم دہراندیاں واضح کیتا اے اسیں کشمیری بھراواں دے نال آں، پاکستان کدی وی کشمیریاں نوں کلیاں نہیں چھڈے گا۔ صدر پاکستان دا سینیٹ دے خصوصی اجلاس نال خطاب وچ کہنا سی اج دا دن ساڈے لئی انتہائی اہمیت دا حامل اے۔ بھارت نے پچھلے اک سال توں کشمیریاں دے بنیادی حقوق نوں پامال کیتا ہویا اے۔ اجے تک کشمیری قیادت نظر بند اے۔ عارف علوی آکھیا مقبوضہ کشمیر وچ بیمار ہسپتال وی نہیں جا سکدے۔ پچھلے اک سال وچ 13ہزار کشمیری نوجواناں نوں گرفتار کیتا گیا۔ ایہدے علاوہ مقبوضہ کشمیر دی معیشت نوں وی بہت وڈا نقصان ہویا۔ پچھلے اک سال وچ 7لکھ کشمیری بیروزگار ہوئے۔ اوہناں دا کہنا سی 5اگست دا اقدام فاشسٹ ہندوتوا دی عکاسی کردا اے۔ 24اکتوبر 1947ء نوں کشمیری عوام نے آزادی دا اعلان کیتا سی پر نہرو دور توں اج تک کشمیریاں تے شکنجہ کدی گھٹ نہیں ہویا۔ لکھاں کشمیریاں نوں شہید کیتا گیا۔ بھارت نے صرف کشمیر دے مسلماناں دے خلاف پیلٹ گن استعمال کیتیاں۔اوہناں نے دنیا نوں ماضی دی یاد کراندیاں آکھیا بھارت نے اقوام متحدہ نال استصواب رائے کران دا وعدہ کیتا سی، پاکستان نے اقوام متحدہ تے بھروسہ کیتا۔ ایہدے علاوہ بھارت نے شملہ معاہدہ تے وی حیلے بہانے بنائے۔ بھارت نے ہر وعدے تے بیان توں انکار کیتا۔ اوہدی ضد لوکاں دی خاطر نہیں سگوں زمین دی خاطر اے۔ پاکستان کشمیر دے لوکاں نوں آزاد کرانا چاہندا اے۔ پاکستان کدی وی کشمیریاں نوں کلیاں نہیں چھڈے گا۔