نیب نے مریم نواز توں 1440کنال اراضی دی رسیداں منگ لئیاں

لہور: قومی احتساب بیورو نیب لہور نے مریم نواز توں 1440کنال اراضی دی رسیداں منگ لئیاں تے ساری دستاویزات 11اگست نوں نال لیان دی ہدایت کیتی اے۔ نیب ولوں مریم نواز نوں وکھو وکھ موضع جات وچ حاصل کیتی گئی اراضی بارے تفصیلات جمع کروان دی ہدایت کیتی گئی اے۔ اوہناں توں پچھیا گیا اے کہ زمین خریدن لئی رقم کتھوں آئی، اراضی دی خریداری تے کناں ٹیکس تے کنی ڈیوٹی دتی۔ 1ہزار 4سو کنال وچوں جے کوئی زمین فروخت کیتی گئی اے تے ایہدی تفصیلات وی فراہم کرو، زمین کہڑے مقصد لئی کمرشل یا فیر زرعی کاشت لئی استعمال کیتی جا رہی اے۔ نیب دے مطابق مریم نواز نے رائیونڈ وچ خلاف قنون اراضی انتہائی سستے ریٹ خریدی۔ شریف خاندان ولوں 2013وچ 3ہزار 5سو 68کنال اراضی خلاف قنون خریدی۔ سب توں ودھ زمین 1ہزار 9سو 36کنال نوازشریف تے شہباز شریف دی والدہ شمیم بی بی دے ناں منتقل ہوئی۔ نوازشریف تے شہباز شریف دے ناں 12,12ایکڑ زمین منتقل ہوئی جہدے وچ ایل ڈی اے دے قواعد و ضوابط نوں نظر انداز کیتا گیا۔2015وچ سابق ڈی جی ایل ڈی اے احد خان چیمہ دے توسط نال لہور دا ماسٹر پلان تبدیل کروایا گیا تے شریف فیملی دی زمین دے آلے دوالے تعمیرات نوں روکن لئی سارے رقبے نوں گرین لینڈ قرار دے دتا گیا۔