لہور ہائیکورٹ نے گھیو دی سرکاری قیمتاں تے عملدرآمد روک دتا

لہور: ہائی کورٹ نے گھیو دی سرکاری قیمتاں مقرر کرن دے احکامات تے عملدرآمد روک دتا۔

عدالت نے وفاقی تے صوبائی حکومتاں سنے دوجے فریقین توں جواب طلب کر لیا۔ لہور ہائی کورٹ دے جسٹس سید مظاہر علی اکبر نقوی نے 25گھیوملز مالکاں دیاں درخواستاں تے سماعت کیتی۔

درخواست گزاراں ولوں ایڈووکیٹ ابو ذر سلیمان نیازی نے دلائل دتے، درخواستاں وچ گھیو دی سرکاری قیمت مقرر کرن دے اقدام نوں چیلنج کیتا گیا۔ درخواست گزار گھیو کمپنیاں دے وکیل ابو ذر سلمان نیازی ایڈووکیٹ نے عدالت نوں دسیا کہ سرکار نے گھیو ملز مالکان نال مشاورت دے بغیر ای گھیو دیاں قیمتاں دے تعین کرکے سرکاری نوٹیفکیشن جاری کر دتا، حکومتی نوٹیفکیشن بدنیتی تے مبنی اے۔

ابوذر سلیمان نیازی نے نشاندہی کیتی کہ سرکار نے مینوفیکچرنگ دے اخراجات دا تخمینہ لائے بغیر ای گھیو دیاں قیمتاں دے تعین دا نوٹیفکیشن جاری کیتا تے حکومتی طے کردہ ریٹ دے مطابق گھیو فروکت ہون نال ملز مالکان نوں شدید نقصان ہووے گا۔

وکیل نے استدعا کیتی حکومتی نوٹیفکیشن نوں کالعدم قرار دتا جاوے۔عدالت نے ابوذر سلیمانی نیازی ایڈووکیٹ دی درخواست سماعت لئی منظور کردیاں گھیو دے سرکاری ریٹ مقرر کرن دے نوٹیفکیشن تے عملدرآمد روکدیاں وفاقی تے صوبائی حکومت توں جواب طلب کر لیا۔