نیب نے شہبازشریف دی ضمانت منسوخی دی عرضی واپس لے لئی

اسلام آباد: نیب نے آشیانہ اقبال ہاؤسنگ کیس وچ شہباز شریف دی ضمانت منسوخی دی عرضی واپس لے لئی۔ سپریم کورٹ وچ آشیانہ اقبال ہاؤسنگ کیس وچ شہباز شریف دی ضمانت منسوخی دی عرضی تے سماعت ہوئی۔

نیب دے وکیل نعیم بخاری نے دلائل دیندیاں آکھیا شہباز شریف نے بولی دا جائزہ لین لئی کمیٹی بنائی، جہنے دسیا بولی دے عملے وچ بعض بے قائدگیاں ہوئیاں، سب توں گھٹ بولی دین والے دا ٹھیکہ کامران کیانی دے کہن تے منسوخ کیتا گیا، کیوں جے کامران کیانی نے فواد حسن فواد نوں رشوت دتی۔نعیم بخاری نے دسیا پنج کروڑ توں ودھ رقم فواد حسن فواد دے بھرا تے اوہناں دی اہلیہ دے اکاؤنٹ وچ گئی، شہباز شریف نے انکوائری لئی اینٹی کرپشن نوں کیس گھلیا پر ایہدا مقصد گھٹ ترین بولی دین والے نوں ہراساں کرنا سی۔

چیف جسٹس نے آکھیا آشیانہ کیس دی ساری کہانی وچ شہباز شریف دا رول چنگے بچے دا اے، شہباز شریف نے پہلے انکوائری کرائی فیر معاملہ اینٹی کرپشن نوں گھلیا، اجے تک لگ رہیا اے فواد حسن فواد دا کردار برے بچے دا ا ے۔

دوران سماعت اہم پیش رفت ایہ ہوئی کہ نیب نے شہبازشریف دی ضمانت منسوخ دی عرضی واپسی لے لئی۔ نیب نے وزیراعلیٰ پنجاب دے عملدرآمد سیکرٹری فواد حسن فواد دی ضمانت دے خلاف عرضی وی واپس لے لئی۔