سرکار نوں نیب قنون تبدیل کرن دا آکھیا سی پر اوہنے نہیں کیتا: چیف جسٹس

اسلام آباد: سپریم کورٹ نے آشیانہ اقبال کیس وچ امتیاز حیدر دی درخواست ضمانت منظور کر لئی۔ سپریم کورٹ وچ پنجاب لینڈ ڈویلپمنٹ کارپوریشن دے سابق چیف ایگزیکٹو افسر امتیاز حیدر دی درخواست ضمانت تے سماعت ہوئی۔

سماعت دے دوران چیف جسٹس نے ریمارکس دتے تاثر دتا گیا سپریم کورٹ نے نیب قنون وچ سختی کر دتی اے، آکھیا گیا کسے نوں نقصان یاں فائدہ اپڑان لئی عدالت نے قنون سخت کیتا، عدالت نے سختی نہیں کیتی صرف قنونی پوزیشن واضح کیتی سی۔

سرکار نوں نیب قنون تبدیل کرن دا آکھیا سی پر سرکار نے کجھ نہیں کیتا۔ چیف جسٹس آکھیا جے ایس معاملے نوں اسیں تفصیل نال سناں گے تے اسیں پورا انصاف کراں گے، ہو سکدا اے اسیں ایس پورے کیس نوں ختم کردیئے، اک ورھے 8مہینے دا دا ویلا بہت طویل ویلا اے، قنون وچ 30دن دا ویلا دتا گیا اے، امتیاز حیدر دا کوئی کردار نہیں بن دا، امتیاز حیدر دے اپنے کردار نوں ویکھنا اے۔ سپریم کورٹ نے امتیاز حیدر دی درخواست ضمانت منظور کر لئی جد کہ ملزم دا پاسپورٹ جمع کران دی نیب دی استدعا رد کردیاں ملزم نوں دس، دس لکھ دے دو مچلکے جمع کران دا حکم دے دتا۔