عالمی ادارے پاکستان دی معاشی بہتری دا اعتراف کر رہے نیں: مشیر خزانہ

اسلام آباد: مشیر خزانہ عبدالحفیظ شیخ آکھیا اے پاکستان دے مالی تے تجارتی خسارے وچ کمی آ رہی اے۔ عالمی ادارے وی ساڈی معاشی بہتری دا اعتراف کر رہے نیں۔ اسلام آباد وچ چیئرمین ایف بی آر دے نال پریس کانفرنس کردیاں حفیظ شیخ آکھیا ایس مالی ورھے معیشت وچ واضح بہتری آئی اے۔

مالی تے تجارتی خسارے وچ کمی آ رہی اے۔ جاری کھاتیاں دا خسارہ گھٹ ہو رہیا اے۔ پچھلے ورھے دے جاری کھاتیاں دے خسارے وچ 35فیصد کمی ہوئی۔ اکتوبر وچ پہلی واری کرنٹ اکاؤنٹ خسارہ سرپلس ہویا۔ مشیر خزانہ د اکہنا سی عالمی ادارے پاکستان دی معاشی بہتری دا اعتراف کر رہے نیں۔

آئی ایم ایف تے ورلڈ بینک دے صدر نے پاکستان دی معاشی کارکردگی نوں سراہیا، ایشین ڈویلپمنٹ بینک نے وی پاکستان وچ معاشی بہتری دا اعتراف کیتا، بلوم برگ نے وی پاکستان سٹاک مارکیٹ نوں بہترین مارکیٹ قرار دتا جد کہ موڈیز نے اپنی ریٹنگ وچ پاکستانی معیشت نوں منفی توں مستحکم کیتا۔

اوہناں آکھیا دیس دی برآمدات ودھ رہیاں نیں جد کہ غیر ملکی سرمایہ کاری وچ وی وادھا ہو رہیا اے۔

پچھلے مہینے پاکستانی برآمدات وچ 10فیصد جد کہ غیر ملکی سرمایہ کاری وچ تقریباً 236فیصد وادھا ہویا۔ پاکستان سٹاک ایکسچینج 40ہزار پوائنٹس دی سطح پار کر گیا اے۔