بلوچستان نوں کرپشن توں پاک کرکے ترقی دی راہ تے گامزن کراں گے: وزیراعلیٰ جام کمال

کوئٹہ: وزیراعلیٰ بلوچستان جام کمال دا کہنا اے ترقی دی راہ وچ سب توں وڈی رکاوٹ بدعنوانی دا ناسور اے جہڑا ہولی ہولی ساڈے جسم دے نال روح نوں وی مردہ کر رہیا اے۔

عالمی انسداد بدعنوانی مہم دے سلسلے وچ قومی احتساب بیورو بلوچستان دے زیر اہتمام کوئٹہ وچ کرپشن دے خلاف آگاہی مہم دا ہفتہ منایا جا رہیا اے۔

ایسے حوالے نال معاشرے وچ بدعنوانی دے خاتمے لئی سول سیکرٹریٹ وچ تقریب دا اہتمام کیتا گیا جہدے اُچیچے پروہنے وزیراعلیٰ بلوچستان جام کمال خان سن۔

اوہناں نے اپنے خطاب وچ ایس عزم دا اظہار کیتا کہ صوبے نوں کرپشن توں پاک کرکے ترقی دی راہ تے گامزن کرنا اے۔ ڈی جی نیب بلوچستان فرمان اللہ خان دا کہنا سی کرپشن دے خاتمے لئی معاشرے دے ہر بندے نوں اپنا کردار ادا کرنا ہووے گا۔

اوہناں آکھیا اسیں تے تسیں اپنے ہر عمل تے ہر فیصلے دے جوابدہ آں۔ نیب بلوچستان دے مطابق میگا کرپشن سنے صوبے دے وکھو وکھ سرکاری تے غیر سرکاری محکمیاں دے بدعنوانی بارے سو توں ودھ کیساں تے کم جاری اے جد کہ ایس ورھے تقریباً 50کروڑ روپے بدعنوان عناصر توں وصولی دے بعد قومی خزانے وچ جمع کرائے جا چکے نیں۔