پی ٹی آئی سرکار نے 10ارب ڈالر توں ودھ دا قرضہ لیا

اسلام آباد: وزیر برائے اقتصادی امور حماد اظہر دا کہنا اے پی ٹی آئی سرکار نے وکھو وکھ ملکاں و اداریاں توں 10ارب ڈالر توں ودھ دا قرضہ لیا۔

پی ٹی آئی سرکار نے اپنے دور اقتدار وچ لئے گئے قرضیاں دی تفصیلات پیش کر دتیاں، قومی اسمبلی اجلاس دے دوران وقفہ سوالات وچ وزیر برائے اقتصادی امور حماد اظہر نے تفصیلات پیش کردیاں آکھیا موجودہ حکومت نے وکھو وکھ ملکاں و اداریاں توں 10ارب 36کروڑ 81لکھ امریکی ڈالر دا قرضہ لیا، پہلے ورھے مجموعی سرکاری قرضے وچ 9اعشاریہ 3کھرب روپے دا وادھا ہویا جد کہ ایس مالی ورھے دے دوران بجٹ خسارہ پورا کرن لئی 3اعشاریہ 7کھرب دے قرضے لئے گئے۔ حماد اظہر آکھیا کرنسی دی قدر وچ کمی دی وجہ توں 2اعشاریہ 6کھرب روپے دا قرضہ لینا پیا، زیادہ نقد بیلس دی وجہ توں 3کھرب روپے دے قرضے دا وادھا ہویا۔