عمران نیازی تے نیب گٹھ جوڑ نے میرے اثاثے منجمد کیتے: شہباز شریف

لندن: مسلم لیگ (ن) دے صدر شہباز شریف دا کہنا اے عمران خان تے نیب گٹھ جوڑ وچ کوئی شک نہیں رہیا، اوہناں نے میرے اثاثے منجمد کیتے۔

لندن وچ پریس کانفرنس کردیاں قومی اسمبلی وچ قائد حزب اختلاف شہباز شریف دا کہنا سی ملک دی سیاسی صورتحال تے تشویش اے، عدالت عظمیٰ نے کل آشیانہ ہاؤسنگ سکیم وچ مینوں سرخرو کیتا، عدالت نے میری ضمانت منسوخی دی نیب درخواست رد کر دتی، عمران خان تے نیب گٹھ جوڑ وچ کوئی شک نہیں رہیا، اوہناں نے شرمندگی توں بچن لئی میرے اثاثے منجمد کیتے۔

شہباز شریف دا کہنا سی نوازشریف سنے پوری ٹیم دی بے گناہی اک اک کرکے ساہمنے آ رہی اے، میں نیب دے عقوبت خانے وچ وی رہیا پر کجھ ثابت نہیں ہویا جد کہ پاکستان دی تریخ وچ عمران خان توں وڈا جھوٹا بندہ نہیں ویکھیا، عمران خان احسان فراموش تے غصے نال بھریا انسان اے، انتشار دے بیج حکومتی پارٹی نے بیجے، اسیں سارے اکٹھے آں۔