ریاست مدینہ صرف سرکار دا کم نہیں، سانوں وی کردار ادا کرنا ہووے گا: چیئرمین نیب

راولپنڈی: چیئرمین نیب جاوید اقبال آکھیا اے ریاست مدینہ دی تعبیر ناممکن نہیں، ریاست مدینہ لئی سب توں پہلاں اپنے آپ نوں بدلنا ہووے گا، ریاست مدینہ صرف سرکار دا کم نہیں، سانوں وی کردار ادا کرنا ہووے گا۔ چیئرمین نیب جاوید اقبال نے انسداد بدعنوانی سیمینار نال خطاب کردیاں آکھیا خواباں نوں محنت نال حقیقت وچ بدلیا جا سکدا اے، 2161کیسز عدالتاں وچ زیر سماعت نیں، ملکی دولت لٹن والیاں نوں حساب دینا ہووے گا، کرپشن دا خاتمہ میری پہلی تے آخری جستجو ہووے گی، کرپشن نے دیس نوں تباہی دے دہانے تے لیا کھلاریا ، عدل و انصاف نال ای ممالک ترقی کردے نیں، سیاستدان نہیں آں کہ تنقید کراں۔

جاوید اقبال دا کہنا سی کرپشن دے خاتمے لئی دیانتداری نال کم کر رہے آں، پاکستان ہمیشہ قائم و دائم رہن لئی بنیا اے، چاہنا آں دیس وچ ترقی دے اجالے آن، ساڈی وفاداری صرف دیس دے نال اے، سفارشی کلچر نوں ختم کرکے میرٹ نوں فروغ دتا، چاہنا آں ساڈے دیس وچ اجہے اجالے آن جہدے وچ ملکی ترقی ہووے، نیب دیس توں کرپشن دے خاتمہ دا اہم ادارہ اے، دیس 10ارب ڈالر توں ودھ دا مقروض ہو گیا اے، معاشرے وچ تعمیری کردار نوں فروغ دینا چاہنے آں۔

چیئرمین نیب نے ہور آکھیا ہن تک 328ارب روپے دی ریکوری کیتی اے، نویں نسل ملک نوں کرپشن فری بنان وچ ساتھ دیوے، احتساب کرنا جرم اے تے کردے رہواں گے، نیب نے کرپشن دے خلاف اقدامات دا آغاز کرکے اپنی منزل دا تعین کر لیا، ساڈی وفاداری صرف ملک دے نال اے۔