میڈیا دا معاشرے وچ کلیدی کردار، سرکار ایہدی آزادی تے یقین رکھدی اے: وزیراعظم

اسلام آباد: وزیراعظم عمران خان آکھیا اے میڈیا معاشرے تے حکومتی اقدامات تے رائے عامہ وچ کردار کلیدی حیثیت رکھدا اے۔ تفصیلات دے مطابق وزیراعظم عمران خان دی زیر صدارت وزارت اطلاعات و نشریات دے حوالے نال اک اہم اجلاس ہویا جہدے وچ اسد عمر، فردوس عاشق اعوان، شہباز گل تے سیکرٹری اطلاعات شریک ہوئے۔

اجلاس وچ وزارت اطلاعات دی کارکردگی ، افرادی قوت تے وکھو وکھ وفاقی وزارتاں دی کارکردگی نوں اجاگر کرن لئی ہم آہنگی ہور موثر بنان تے وزیراعظم نوں بریفنگ دتی گئی۔

ایہدے علاوہ ڈیجیٹل میڈیا بارے جدید ٹیکنالوجی بروئے کار لیان دے ضمن وچ وکھو وکھ تجویزاں تے وی غور کیتا گیا۔

ایس موقع تے اجلاس نال خطاب وچ وزیراعظم دا کہنا سی سرکار میڈیا دی آزادی تے یقین رکھدی اے۔ میڈیا معاشرے تے حکومتی اقدامات تے رائے عامہ وچ کردار کلیدی حیثیت رکھدا اے۔

وزیراعظم عمران خان دا کہنا سی وزارت اطلاعات سرکار دے عوامی فلاح و بہبود دے منصوبیاں نوں اجاگر کرے جد کہ معاشی ترقی تے خارجہ امور وچ پاکستانی حیثیت نوں اجاگر کرن لئی موثر اقدامات وی کیتے جان۔

اوہناں نے موجودہ دور دے مطابق وزارت اطلاعات نوں جدید ٹیکنالوجی بروئے کار لیان دی ہدایت وی کیتی۔