نوازشریف واپس آن تے پچھلا حساب چکان: شہزاد اکبر

اسلام آباد: معاون خصوصی برائے داخلہ شہزاد اکبر دا کہنا اے نوازشریف واپس آن تے پچھلا حساب چکان۔ اپنے بیان وچ شہزاد اکبر آکھیا 3وار وزیراعظم منتخب ہون دے بعد سپریم کورٹ نے نوازشریف نوں نااہل قرار دتا، سپریم کورٹ نے آکھیا نوازشریف صادق تے امین نہیں، قوم نوں گمراہ کرن لئی آکھیا جاندا اے اوہ واپس آن گے، اوہناں نوں واپس لیان لئی تے سرکار، عدالت تے ادارے کم کر رہے نیں۔

شہباز شریف تے نوازشریف دی شخصی ضمانت دتی ہوئی اے، اوہ بوکھلاہٹ دا شکار نیں کیوں جے اوہ نیب دے شکنجے وچ نیں۔ شہزاد اکبر آکھیا منظور پاپڑ والے تے ریڑھی والے دے ذریعے ارباں روپے دی منی لانڈرنگ کیتی گئی، منی لانڈرنگ دا سوال کریئے تے (ن) لیگی رہنما مہنگائی دی گل شروع کردے نیں، عوام لئی فیصلے اوہی کرن گے جہناں نوں عوام نے منتخب کیتا اے، سرکار ایہناں دے لئے ہوئے قرضے اتار رہی اے تے ایہناں دے کیتے کم ٹھیک کر رہی اے۔