اک ہور ننھی زینب زیادتی دے بعد قتل

چارسدہ: ڈھائی سالہ بالڑی نوں اغوا دے بعد زیادتی دا نشانہ بنایا گیا تے فیر قتل کر دتا گیا۔ بالڑی دی شناخت زینب دے ناں توں ہوئی اے جہنوں پچھلے دیہاڑ اغوا کیتا گیا سی۔ ہسپتال ذرائع دا کہنا اے میڈیکل رپورٹ دے مطابق بالڑی دے نال 18گھنٹے پہلاں جنسی زیادتی کیتی گئی جد کہ زیادتی دے بعد بالڑی دا پیٹ تے سینہ چھری نال کٹ دتا گیا۔ ڈی این اے لئی بالڑی دے جسم دے نمونے خیبر میڈیکل کالج پشاور گھل دتے نیں۔

دوجے پاسے وزیراعلیٰ خیبر پختونخوا محمود خان نے آئی جی پی تے دوجے حکام نوں بالڑی نال زیادتی دے واقعے وچ ملوث بندیاں دی فوری گرفتاری دا حکم دے دتا اے۔ وزیراعلیٰ محمود خان دا کہنا سی واقعے وچ ملوث بندیاں نوں نشان عبرت بنایا جائے گا، واقعہ انتہائی دلخراش تے انسانیت سوز اے، ملوث بندے کسے صورت قنون دی گرفت توں بچ نہیں سکن گے۔