دنیا دے حالات جیویں دے وی ہون، پاکستان دے نال دوستی قائم رہوے گی، چینی صدر دا عزم

بیجنگ( بھلیکھا ٹی وی ) پاکستان دے دیرینہ دوست ملک چین دے صدر شی جن پنگ نے وزیراعظم عمران خان نوں لکھے گئے اپنے خط وچ ایس عزم دا اظہار کیتا اے دنیا دے حالات جیویں دے وی ہون ، دوواں ملکاں دی دوستی قائم رہوے گی۔ صدر شی جن پنگ نے اپنے خط وچ وزیراعظم عمران خان نوں سالگرہ دی مبارکباد دیندیاں اپنی نیک خواہشات دا وی اظہار کیتا۔ اوہناں نے پاک چین دوستی نوں ہور مضبوط کرن دے عزم دا وی اعادہ کیتا۔ چینی صدر دا کہنا سی ساڈی پاکستان دے نال دوستی مثالی اے۔ دوواں ملکاں دے تعلقات ہر آزمائش تے پورا اترے۔ کورونا دے دوران دوواں ملکاں وچکار مثالی تعاون ویکھن نوں ملیا۔ اوہناں دا کہنا سی چین تے پاکستان دی دوستی دن بدن مضبوط ہو رہی اے۔ دوواں قوماں اک دوجے دی بہتری چاہندیاں نیں۔ سی پیک خطے دی ترقی لئی اہم کردار اے۔