پی آئی اے دا امریکا وچ روز ویلٹ ہوٹل بند کرن دا فیصلہ

کراچی: پی آئی اے نے امریکا وچ واقع تریخی اہمیت دے حامل روز ویلٹ ہوٹل نوں بند کرن دا فیصلہ کر لیا۔ ترجمان پی آئی اے عبداللہ خان نے روز ویلٹ بند ہون دی تصدیق کردیاں ہوئیاں آکھیا نیویارک وچ پی آئی اے دے روز ویلٹ ہوٹل نوں 31اکتوبر توں بند کیتا جا رہیا اے۔ ترجمان دے بعد مالی اخراجات پاروں روز ویلٹ ہوٹل بند کیتا جا رہیا اے، روز ویلٹ ہوٹل دے مستقبل دے فیصلے لئی فنانشل ایکسپرٹ دی خدمات حاصل کیتی جان گیاں۔

پی آئی اے دا ملکیت ہوٹل قرض وچ ڈُب چکیا اے تے ایہدے اثاثے خطرے دی زد میں نیں، پچھلے دو سال وچ ہوٹل نوں 10ملین ڈالر دا نقصان ہویا جد کہ کابینہ دی اقتصادی رابطہ کمیٹی نے روز ویلٹ ہوٹل لئی فنڈز دی منظوری دا وی اعلان کیتا سی۔ 1979ء وچ پی آئی اے نے سعودی عرب دے شہزادے فیصل بن خالد بن عبدالعزیز السعود دے نال رل کے ایہنوں لیز تے حاصل کر لیا۔ ایس لیز دی شرطاں وچ اک شق ایہ وی شامل سی کہ 20ورھے بعد جے پی آئی اے چاہوے گی تے ایس ہوٹل دی عمارت وی خرید سکدی اے تے ایسے پاروں ایس ہوٹل نوں 1999ء وچ پی آئی اے نے 3کروڑ 60لکھ ڈالر وچ خرید لیا سی جہدے لئی ادارے نے ہوٹل مالک پال ملسٹین دے نال طویل قنونی جنگ وی لڑی سی تے کامیابی حاصل کیتی۔