سرکار نے ہائیکورٹ وچ نوازشریف دے اخباری اشتہار لئی اخراجات جمع کرا دتے

اسلام آباد: وفاقی حکومت نے اسلام آباد ہائیکورٹ وچ نوازشریف دے اخباری اشتہار لئی اخراجات جمع کرا دتے۔ العزیزیہ تے ایون فیلڈ ریفرنس وچ نوازشریف نوں بذریعہ اشتہار طلب کیتا گیا اے۔ ایس بارے وفاقی حکومت نے اسلام آباد ہائی کورٹ وچ نوازشریف دے اخباری اشتہار لئی اخراجات جمع کرا دتے۔ ایڈیشنل اٹارنی جنرل نے رجسٹرار آفس وچ 60ہزار روپے جمع کرائے۔

ایڈیشنل اٹارنی جنرل نے رقم دی ادائیگی بارے رجسٹرار آفسر نوں خط لکھیا جہدے وچ اسلام آباد ہائی کورٹ دے 7اکتوبر دے حکم دا حوالہ دتا گیا۔ واضح رہوے اسلام آباد ہائی کورٹ نے العزیزیہ سٹیل ملز ریفرنس وچ نوازشریف نوں بذریعہ اخباری اشتہار طلب کردیاں ہوئیاں آکھیا سی کہ نوازشریف دی بذریعہ اشتہار طلبی دا سارا خرچہ وفاقی حکومت برداشت کرے گی تے ایڈیشنل اٹارنی جنرل اشتہاراں دی رقم 2دن وچ جمع کران۔