کنٹونمنٹ بورڈ نوں تاحکم ثانی پراپرٹی ٹیکس وصولی توں روک دتا گیا

لہور: ہائی کورٹ نے کنٹونمنٹ بورڈ نوں تاحکم ثانی پراپرٹی ٹیکس وصولی توں روک دتا۔ لہور ہائی کورٹ وچ جسٹس شاہد کریم دی سربراہی وچ کنٹونمنٹ بورڈ نوں پراپرٹی ٹیکس وصولی توں روکن بارے درخواست تے سماعت ہوئی، درخواست گزار ولوں موقف اپنایا گیا 18ویں ترمیم دے بعد ٹیکس وصولی دا معاملہ صوبیاں نوں منتقل ہو چکیا اے تے شہری پراپرٹیز ایکٹ 1958ء دے تحت کنٹونمنٹ بورڈ نوں ٹیکس وصولی دا اختیار نہیں اے، کنٹونمنٹ بورڈ وزارت دفاع تے آرمڈ فورسز دے زیر اثر کم کردا اے جہنوں پراپرٹی ٹیکس وصولی دا اختیار نہیں اے۔ درخواست وچ ہور آکھیا گیا کنٹونمنٹ ایکٹ 1924ء دی دفعہ 60دے تحت بورڈ پراپرٹی ٹیکس میونسپل کارپوریشن دے متعین کیتے ریٹ دے تحت وصول کر سکدا اے جد کہ کنٹونمنٹ بورڈ نے پراپرٹی ٹیکس وچ 20گنا وادھا کر دتا اے ایس لئی کنٹونمنٹ بورڈ دا اضافی تخمینہ دے تحت پراپرٹی ٹیکس وصولی دا اقدام غیر قنونی قرار دے کے کالعدم کیتا جائے۔

عدالت درخواست گزار دے دلائل سنن دے بعد کنٹونمنٹ بورڈ نوں تاحکم ثانی پراپرٹی ٹیکس وصولی توں روک دتا تے وزارت دفاع، گوجرانوالہ کنٹونمنٹ بورڈ تے پنجاب سرکار نوں نوٹس جاری کر دتے۔ عدالت نے ریمارکس وچ آکھیا کہڑے قنون دے تحت کنٹونمنٹ بورڈ شہری علاقیاں توں پراپرٹی ٹیکس وصول کر رہیا اے۔