اپوزیشن جنے جلسے کر لوے قانون توڑیا تے سدھے جیل وچ جان گے: وزیراعظم

سلام آباد: وزیراعظم عمران خان دا کہنا اے نوازشریف لندن وچ بہہ کے اپنی چوری بچان دی تحریک چلا رہے نیں۔ اسلام آباد وچ آل پاکستان انصاف لائرز فورم دے زیر اہتمام سیمینار نال خطاب کردیاں وزیراعظم عمران خان دا کہنا سی مدینہ دی ریاست دی بنیاد قنون دی بالادستی سی تے ریاست مدینہ وچ کوئی وی قنون توں اُتے نہیں سی ایس لئی قنون دی بالادستی دے بغیر خوشحالی ممکن نہیں۔

وزیراعظم عمران خان دا کہنا سی ایہ پاکستان لئی بڑا اہم ویلا اے، سارے بیروزگار سیاستدان اکٹھے ہو گئے نیں، پچھیا جائے کہ ایہ سارے کیوں اکٹھے ہوئے نیں، ایہ سب ایس لئی اکٹھے ہوئے نیں کیوں جے ایہ قنون دی بالادستی نہیں من دے، ایہ کہندے نیں کہ اسیں چوری کریئے، ڈاکہ پایئے تے کوئی سانوں ہتھ نہ لاوے، عدالت 2سال دے بعد فیصلہ کردی اے تے آکھیا جاندا اے کہ مینوں کیوں کڈھیا، ایہ سپریم کورٹ دا فیصلہ نہیں من دے، ایہ فیصلے ایس لئی نہیں من دے کیوں جے اوہ سمجھدے نیں کہ اوہ قنون توں اُتے نیں۔ وزیراعظم آکھیا کوئی ویکھے کہ 30ورھے پہلاں ایہناں دے کول کیہ سی تے ہن کیہ اے، ایہ سمجھدے نیں کہ باہر نکل کے عمران خان نوں بلیک میل کر لین گے تے انج نہیں ہو سکدا، ایہ لوک کسے ہور مقصد لئی نکلے نیں۔ اوہناں دا کہنا سی نوازشریف آپ لندن وچ بیٹھے نیں تے کارکناں توں کہندے نیں سڑکاں تے نکلو، ایہ کارکناں نوں قیمے دے نان وی کھوا دین تے کارکن نہیں نکلن گے، نوازشریف لندن وچ بہہ کے اپنی چوری بچان دی تحریک چلا رہے نیں۔