!مہنگائی!

شاعر – سید حاجی شاہ ساجد

مرکزی نائب صدر پنجاب لوک لہر ساہیوال۔
ہر پاسے مچی ہوئی اِکو ای دہائی اے
مار گئی مہنگائی سانوں مار گئی مہنگائی اے
دس دن پہلاں گل سنن وچ آئی اے
دارو ھوٹے مری اک ماڑیاں دی مائی اے
کفن توں باجھ اوہناں لاش دفنائی اے
مار گئی مہنگائی سانوں مار گئی مہنگائی اے
لٹی ھوئی دولتاں نوں باہر اپڑان لئی
کھل ساڈی لاہن لء تے زندگی مکان لئ
کدی آیا خان کدی بھٹو دا جوائی اے
مار گئی مہنگائی سانوں مار گئی مہنگائی
میاں صاحبان ‘ عمران ‘ زرداری جی ‘
لگے ساڈے پچھے یارو بن کے بیماری جی
کر دتی اہناں ساڈے دیس دی تباہی اے
مار گئی مہنگائی سانوں مار گئی مہنگائی اے
ننگی ھو کے نچے ایتھے بھکھ دن رات اے
پچھدا نہ کوئی ایتھے ماڑیاں دی وات اے
روٹی نوں پئی سکدی تیری ایہہ خدائی اے
مار گئی مہنگائی سانوں مار گئی مہنگائی اے
لگ گیا ساڈے کھان پین تے وی بین اے
قبراں وی مل دیاں جین تے وی بین اے
مرے کئی مریض لئی جاندی نہ دوائی اے
مار گئی مہنگائی سانوں مار گئی مہنگائی اے
بھکھ نال مردے پئے تھر وچ بال نیں
دارو نہ دوا یارو ہوئے مندے حال نیں
ماڑیاں دی بھکھ نیں چا زندگی مکائی اے
مار گئی مہنگائی سانوں مار گئی مہنگائی اے
ہر چیز مہنگی ایتھے موت ھوئی سستی
بھکھاں نیں مٹا چھڈی ماڑیاں دی ہستی
حرام تے حال دی تمیز چا بھلائی اے
مار گئی مہنگائی سانوں مار گئی مہنگائی اے
ٹیکساں دی نِت روز ہوندی اے بوچھاڑ جی
جہڑا سچ بولے دیندے جیلاں وچ تاڑ جی
انھیاں دے ہتھ چہ گلیل یارو آئی اے
مار گئی مہنگائی سانوں مار گئی مہنگائی اے
کتیاں دے ہتھ وچ ہڈی میرا دیس اے
چونڈ چونڈ کھائی جان بدل کے بھیس اے
لوٹیاں نیں ہر پاسے لٹ چا مچائی اے
مار گئی مہنگائی سانوں مار گئی مہنگائی اے
پہلاں ای غریبی ایتھے کیتا مندا حال سی
ہر تھاں مہنگائی نیں وچھایا ھویا جال سی
رہی سہی وِیہ عمران خاں مکائی اے
مار گئی مہنگائی سانوں مار گئی مہنگائی اے
جیلاں دا نہیں ڈر مینوں رب کولوں ڈرنآں
حاجی شاہ میں سولی تے وی گل سچی کرنآں
ایسے لئی تے رب میری عزت بنائی اے
مار گئی مہنگائی سانوں مار گئی مہنگائی اے